കൂത്തുപറമ്പ്: സ്വകാര്യബസ് ക്ലീനറെ യാത്രക്കാരനായ പൊലിസുകാരന്‍ മര്‍ദിച്ചതായി പരാതി. തലശ്ശേരി-ഇരിട്ടി റൂട്ടിലോടുന്ന വികാസ് ബസ് ക്ലീനര്‍ സുധീഷി(32)നാണു മര്‍ദനമേറ്റത്. ഇന്നലെ ഉച്ചയ്ക്ക് രണ്ടോടെ നെല്ലൂന്നി നെടുവട്ടം കുന്നിലാണു സംഭവം. നിര്‍മലഗിരി കോളജ് സ്റ്റോപ്പില്‍ നിന്നു കയറിയ വിദ്യാര്‍ഥികളോടു കൂടുതല്‍ വിദ്യാര്‍ഥികള്‍ ഒന്നിച്ചു കയറുമ്പോഴുണ്ടാകുന്ന ബുദ്ധിമുട്ടുകളെകുറിച്ചു സംസാരിക്കുന്നതിനിടെ ബസ് യാത്രക്കാരനായ പൊലിസുകാരന്‍ ക്ലീനറെ ചവിട്ടി പരുക്കേല്‍പ്പിച്ചുവെന്നാണു പരാതി. സുധീഷിനെ കൂത്തുപറമ്പ് താലൂക്കാശുപത്രിയില്‍ പ്രവേശിപ്പിച്ചു. സംഭവത്തില്‍ പ്രതിഷേധിച്ചു തലശ്ശേരി-ഇരിട്ടി റൂട്ടിലും ഇരിട്ടി-കണ്ണൂര്‍ റൂട്ടിലും ഇന്ന് ബി.എം.എസ്, സി.ഐ.ടി.യു യൂനിയനുകള്‍ സംയുക്തമായി ബസ് പണിമുടക്കിന് ആഹ്വാനം ചെയ്തിട്ടുണ്ട്.