പാലക്കാട്: പട്ടികജാതി, പട്ടികവര്‍ഗ വികസന വകുപ്പും കിര്‍ത്താഡ്‌സും സംയുക്തമായി സംഘടിപ്പിക്കുന്ന ഉത്പന്ന പ്രദര്‍ശന വിപണന മേള നാടന്‍ കലാമേള 'ഗദ്ദിക 2016' പാലക്കാടു വടക്കഞ്ചേരിയില്‍ നടക്കും. 19 മുതല്‍ 28 വരെ മംഗലംപാലത്തിന് സമീപമുള്ള മൈതാനിയിലാണ് മേള നടക്കുകയെന്ന് മന്ത്രി എ.കെ. ബാലന്‍. വാര്‍ത്താസമ്മേളനത്തില്‍ പറഞ്ഞു.
19ന് വൈകുന്നേരം 5.30ന് മുഖ്യമന്ത്രി പിണറായി വിജയന്‍ മേള ഉദ്ഘാടനം ചെയ്യും. മന്ത്രി എ.കെ. ബാലന്‍ അധ്യക്ഷനാകും. സ്റ്റാളുകളുടെ ഉദ്ഘാടനം പി.കെ. ബിജു എം.പി നിര്‍വഹിക്കും. കെ.പി.എ.സി. ലളിത വിശിഷ്ടാതിഥിയാകും. പത്തു ദിവസങ്ങളിലായി നടക്കുന്ന പരിപാടിയില്‍ വ്യത്യസ്ത തരം കലാ അവതരണങ്ങള്‍ നടക്കും. മന്ത്രിമാര്‍, മറ്റു ജനപ്രതിനിധികള്‍, സിനിമ-കലാ രംഗത്തെ പ്രമുഖര്‍ പങ്കെടുക്കും. സമാപന സമ്മേളനം വി.എസ്. അച്യുതാനന്ദന്‍ ഉദ്ഘാടനം ചെയ്യും.
എല്ലാ ദിവസവും രാവിലെ 10 മുതല്‍ പ്രദര്‍ശനം നടക്കും. വൈകുന്നേരങ്ങളില്‍ സാംസ്‌കാരിക സായഹ്നവും സംഘടിപ്പിച്ചിട്ടുണ്ട്. കേരളത്തിലെ ആദിവാസി കലാമേളകളും, മജീഷ്യന്‍ മുതുകാടിന്റെ മാജിക് ഷോയും,ആദിവാസികലകളായ പളിയനൃത്തം, മംഗലംകളി,മന്നാന്‍കൂത്ത്, ഉരാളികൂത്തു്, ഗദ്ദിക, ഇരുളനൃത്തം, വട്ടക്കളി തുടങ്ങിയവയുടെ അവതരണവും നടക്കും. 23 ന് വൈകിട്ട് നടക്കുന്ന പരിപാടിയില്‍ പ്രതിപക്ഷ നേതാവ്. രമേശ് ചെന്നിത്തല പങ്കെടുക്കും. വാര്‍ത്താസമ്മേളനത്തില്‍ ജില്ലാ കലക്ടര്‍ പി. മേരിക്കുട്ടി, സ്വാഗതസംഘം പ്രസിഡന്റ് സി.കെ. ചാമുണ്ണി പങ്കെടുത്തു.