എടച്ചേരി: ജില്ലയിലെ ഏറാമലയില്‍ നിന്ന് ഇത്തവണ നിയമസഭാ തെരഞ്ഞെടുപ്പിലേക്കു മത്സരിക്കാന്‍ മൂന്നു പേരുണ്ടായിരുന്നു. ഒരേ നാട്ടുകാരാണെങ്കിലും മത്സരിച്ചതു വിവിധ മണ്ഡലങ്ങളില്‍. ടി.പി ചന്ദ്രശേഖരന്റെ ഭാര്യയും ആര്‍.എം.പി നേതാവുമായ രമ, മുസ്‌ലിം ലീഗ് ജില്ലാ ട്രഷറര്‍ പാറക്കല്‍ അബ്ദുല്ല, ജനതാദള്‍ നേതാവ് മനയത്ത് ചന്ദ്രന്‍ എന്നിവരായിരുന്നു നാട്ടുകാരായ മൂന്നു സ്ഥാനാര്‍ഥികള്‍. ഇവരില്‍ രമയും ചന്ദ്രനും വടകര മണ്ഡലത്തില്‍ മത്സരിച്ചപ്പോള്‍ പാറക്കല്‍ അബ്ദുല്ല കുറ്റ്യാടിയില്‍ നിന്നു ജനവിധി തേടുകയായിരുന്നു.
ഇവര്‍ വിജയിക്കുകയാണെങ്കില്‍ തങ്ങളുടെ നാട്ടുകാരായ രണ്ട് എം.എല്‍.എമാരെ ലഭിക്കുമെന്ന പ്രതീക്ഷയിലായിരുന്നു ഏറാമലക്കാര്‍. പക്ഷെ തെരഞ്ഞെടുപ്പു ഫലം വന്നപ്പോള്‍ ജയിച്ചത് ഒരാള്‍ മാത്രം. കുറ്റ്യാടിയില്‍ നിന്ന് പാറക്കല്‍ അബ്ദുല്ല വിജയിച്ച വിവരമറിഞ്ഞു നാട്ടുകാര്‍ ഏറെ സന്തോഷിച്ചു. ഇടതുകോട്ടയായ കുറ്റ്യാടിയില്‍ കന്നിയങ്കത്തിനിറങ്ങിയ പാറക്കലിന്റെ വിജയം കഴിഞ്ഞ ദിവസം ശരിക്കും നാട്ടിന്റെ ഉത്സവമാക്കി മാറ്റുകയായിരുന്നു ഏറാമലക്കാര്‍.
പടക്കം പൊട്ടിച്ചും മധുര പലഹാരങ്ങള്‍ വിതരണം ചെയ്തുമാണ് കെ.എം.സി.സി നേതാവു കൂടിയായ തങ്ങളുടെ പ്രിയ സ്ഥാനാര്‍ഥിയുടെ വിജയത്തില്‍ നാട്ടുകാര്‍ ആഹ്ലാദം പ്രകടിപ്പിച്ചത്. അതേസമയം, മനയത്ത് ചന്ദ്രനും രമയും സിറ്റിങ് എം.എല്‍.എ കൂടിയായ സി.കെ നാണുവിനോടു മത്സരിച്ചു പരാജയപ്പെടുകയായിരുന്നു.