പള്ളുരുത്തി: പെരുമ്പടപ്പില്‍ സാമൂഹ്യ വിരുദ്ധര്‍ അഴിഞ്ഞാടുന്നു. വീടിനരുകില്‍ പാര്‍ക്ക് ചെയ്തിരുന്ന പാസ്സഞ്ചര്‍ ഓട്ടോ തീവെച്ചു നശിപ്പിച്ചു. പെരുമ്പടപ്പ് പാര്‍ക്ക് റോഡില്‍ കുന്നേല്‍ സ്റ്റാലിന്റെ ഓട്ടോറിക്ഷയാണ് പൂര്‍ണമായും കത്തിനശിച്ച നിലയില്‍ കണ്ടത്.
ചൊവ്വാഴ്ച പുലര്‍ച്ചെ 1.30 ഓടെ അയല്‍വാസികളാണ് ഓട്ടോറിക്ഷ കത്തുന്നത് കണ്ടത്. ഉടന്‍ തന്നെ വീട്ടുകാരെ വിളിച്ചുണര്‍ത്തി തീയണക്കാന്‍ ശ്രമിച്ചുവെങ്കിലും പൂര്‍ണമായും കത്തിനശിച്ചിരുന്നു. പെരുമ്പടപ്പിലും, പരിസര പ്രദേശങ്ങളിലും സാമൂഹ്യ വിരുദ്ധരും, മയക്കുമരുന്നു സംഘങ്ങളും സാമൂഹ്വ സുരക്ഷക്ക് ഭീഷണിയായി മാറിയിരിക്കുകയാണെന്ന് നാട്ടുകാര്‍ പരാതിപ്പെട്ടു. മൂന്നു ദിവസം മുന്‍പ് ഇതേ സ്ഥലത്ത് പാര്‍ക്ക് ചെയ്തിരുന്ന പള്ളിപറമ്പില്‍ ബാബുവിന്റെ ഓട്ടോറിക്ഷയും തീവെച്ചു നശിപ്പിക്കാന്‍ ശ്രമിച്ചിരുന്നു. ഇന്നലെ കത്തി നശിച്ച ഓട്ടോറിക്ഷ ഒരാഴ്ച മുന്‍പ് ടെസ്റ്റ് വര്‍ക്ക് നടത്തി പുറത്തിറക്കിയതാണ് പൊലിസ് സംഭവത്തില്‍ ഗൗരവമായി ഇടപെടുന്നില്ലെന്ന് നാട്ടുകാര്‍ പറയുന്നു.