ചേര്‍ത്തല : വനിതാ സിവില്‍ പൊലീസ് ഓഫിസറെ പീഡിപ്പിക്കാന്‍ ശ്രമിച്ച കേസ് അന്വേഷണം ക്രൈംബ്രാഞ്ചിന് കൈമാറി.
കേസില്‍ പൊലീസ് പ്രതിയെ സഹായിക്കുന്നതായുള്ള പരാതിയെ തുടര്‍ന്ന് ജില്ലാ പൊലീസ് മേധാവി ചേര്‍ത്തല ഡി.വൈ.എസ്.പി യോട് റിപ്പോര്‍ട്ട് നല്‍കുവാന്‍ ആവശ്യപ്പെട്ടിട്ട് നല്‍കാത്ത സാഹചര്യത്തിലാണ് അന്വേഷണം ക്രൈംബ്രാഞ്ചിനെ ഏല്‍പ്പിച്ചത്.
അതേസമയം സ്‌പെഷല്‍ ബ്രാഞ്ച് ഡി.വൈ.എസ.്പി ഇന്നലെ അര്‍ത്തുങ്കല്‍ സ്റ്റേഷനിലെത്തി പീഡനശ്രമത്തിന് ഇരയായ വനിതാ പൊലീസില്‍ നിന്നു മൊഴിയെടുത്തു.റിപ്പോര്‍ട്ട് ഇന്ന് തന്നെ നല്‍കും. ചേര്‍ത്തല പൊലീസും ഇവരുടെ വീട്ടിലെത്തി സീന്‍ മഹസര്‍ തയ്യാറാക്കി. ചേര്‍ത്തല ഡി.വൈ.എസ്.പി വൈ.ആര്‍.റസ്റ്റവും ഇവരുടെ മൊഴി രേഖപ്പെടുത്തി. ആദ്യം പറഞ്ഞ മൊഴിയില്‍ നിന്നു വ്യത്യസ്തമായാണ് ഇപ്പോഴത്തെ മൊഴിയെന്ന് ഡി.വൈ.എസ്.പി പറഞ്ഞു. നേരത്തെ പൊലീസ് സ്റ്റേഷനില്‍ നല്‍കിയ മൊഴിയുടെ വീഡിയോ ദൃശ്യങ്ങളും പരിശോധിച്ചു. വിശദമായ റിപ്പോര്‍ട്ട് ജില്ലാ പൊലീസ് മേധാവിക്ക് ഇന്ന് കൈമാറുമെന്ന് ഡി.വൈ.എസ്.പി പറഞ്ഞു.