തിരുവനന്തപുരം: ശാസ്ത്ര സാങ്കേതിക സര്‍വകലാശാലയുടെ കീഴിലുള്ള സര്‍ക്കാര്‍ എന്‍ജിനിയറിങ് കോളജുകളിലെ ഒന്നാം സെമസ്റ്റര്‍ പരീക്ഷ ഇന്നും മുടങ്ങി. വിവിധ കോളജുകളില്‍ വിദ്യാര്‍ഥികള്‍ പരീക്ഷ മുടക്കി പ്രതിഷേധിക്കുകയായിരുന്നു. ഇന്നലെയും ചില കോളജുകളില്‍ എസ്.എഫ്.ഐയുടെ നേതൃത്വത്തില്‍ വിദ്യാര്‍ഥികള്‍ പരീക്ഷ മുടക്കിയിരുന്നു. സംസ്ഥാനത്ത് ഒന്‍പത് സര്‍ക്കാര്‍ എന്‍ജിനിയറിങ് കോളജുകളിലടക്കം 16 കോളജുകളിലെ പരീക്ഷകള്‍ ഇന്ന് തടസപ്പെട്ടു.

തിരുവനന്തപുരം സി.ഇ.ടി എന്‍ജിനിയറിങ് കോളജിലും, ബാര്‍ടണ്‍ ഹില്‍,കോഴിക്കോട്,തൃശൂര്‍,കണ്ണൂര്‍,പാലക്കാട്,കാസര്‍കോട് എന്നീ എന്‍ജിനിയറിങ് കോളജുകളിലെല്ലാം ഇന്ന് പരീക്ഷ മുടങ്ങി. തിരുവനന്തപുരം സി.ഇ.ടിയിലും കോഴിക്കോട് ഗവ. എന്‍ജിനിയറിങ് കോളജിലും സംഭവം റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകരെ വിദ്യാര്‍ഥികള്‍ തടഞ്ഞുവച്ചു. കൊല്ലം ടി.കെ.എമ്മില്‍ വിദ്യാര്‍ഥികള്‍ സാങ്കേതിക സര്‍വകലാശാല വി.സിയുടെ കോലം കത്തിച്ചു.