വായന പ്രോത്സാഹിപ്പിക്കുന്നതിനായി സ്റ്റേറ്റ് സെന്‍ട്രല്‍ ലൈബ്രറി വായനയ്ക്ക് വേണ്ടി ഒരു പുതുവര്‍ഷ തീരുമാനം എന്ന പരിപാടി നടപ്പാക്കും. നൂറ് പുസ്തകം വരെ വായിക്കുമെന്ന് കുട്ടികളെക്കൊണ്ട് പുതുവര്‍ഷ തീരുമാനം എടുപ്പിക്കുന്നതാണ് പരിപാടി. മലയാളത്തിലും ഇംഗ്ലീഷിലുമുള്ള ക്ലാസിക് പുസ്തകങ്ങളടക്കമുള്ള തെരഞ്ഞെടുത്ത പുസ്തകങ്ങള്‍ ഇതിനുവേണ്ടി സജ്ജീകരിച്ചിട്ടുണ്ട്.

ഓരോ നാലുമാസം കൂടുമ്പോഴും കുട്ടികളുടെ വായന നിരീക്ഷിക്കുകയും വിവിധ പരിപാടികള്‍ നടത്തുകയും ചെയ്യും. കോളേജ് വിദ്യാര്‍ത്ഥികളെയടക്കം ഉദ്ദേശിച്ചുള്ള ഈ പരിപാടികളുടെ ഭാഗമായി ലൈബ്രറി നിയമങ്ങള്‍ക്ക് വിധേയമായി കൂടുതല്‍ പേര്‍ക്ക് അംഗത്വവും നല്‍കും. പരിപാടിയില്‍ ചേരുന്നതിന് കുട്ടികളുടെ ലൈബ്രറിയില്‍ ഡിസംബര്‍ 15 മുതല്‍ പേര് രജിസ്റ്റര്‍ ചെയ്യണം.

ജനുവരി ഏഴിന് ആരംഭിക്കുന്ന പരിപാടിയില്‍ ജനുവരി 30 വരെ പേര് രജിസ്റ്റര്‍ ചെയ്യാം. പുസ്തകങ്ങളുടെ ലിസ്റ്റ് കുട്ടികളുടെ ലൈബ്രറിയില്‍ നിന്നും ലഭ്യമാണ്. മറ്റ് വായനക്കാര്‍ക്കും ഈ പരിപാടിയില്‍ പങ്ക് ചേരാവുന്നതും വായിക്കാനുള്ള പുസ്തകങ്ങള്‍ നിര്‍ദ്ദേശിക്കുകയും ചെയ്യാവുന്നതാണ്.