ന്യൂ ഡല്‍ഹി: തമിഴ്‌നാട് മുഖ്യമന്ത്രി ജയലളിതയുടെ മരണത്തെ കുറിച്ച് സിബിഐ അന്വേഷണം വേണമെന്ന് ആവശ്യപ്പെട്ട് സുപ്രീം കോടതിയില്‍ ഹര്‍ജി. ചെന്നൈ ആസ്ഥാനമാക്കിയുള്ള സന്നദ്ധ സംഘടനയാണ് സുപ്രീം കോടതിയില്‍ മരണത്തിലെ ദുരൂഹത ചൂണ്ടികാണിച്ച് ഹര്‍ജി നല്‍കിയത്. ജയലളിതയുടെ മെഡിക്കല്‍ രേഖകള്‍ കണ്ടെടുക്കണമെന്നും ഹര്‍ജിക്കാര്‍ ആവശ്യപ്പെടുന്നു. വിഷം നല്‍കിയെന്ന് സംശയിക്കുന്നതായുള്ള ആരോപണവും ഹര്‍ജിക്കാര്‍ ഉയര്‍ത്തി.
കേസില്‍ തീരുമാനമാകും വരെ സ്വത്തുക്കള്‍ കൈമാറ്റം ചെയ്യാന്‍ അനുവദിക്കരുതെന്നും ഹര്‍ജിയില്‍ പറയുന്നു. രണ്ട് മാസത്തിലേറെയായി നീണ്ടുനിന്ന ജയലളിതയുടെ അപ്പോളോ ആശുപത്രിവാസത്തിന്റെ വിവരങ്ങള്‍ പൂര്‍ണമായും രഹസ്യമായാണ് കൈകാര്യം ചെയ്തത്. അതിനാല്‍ ആശുപത്രി രേഖകള്‍ കണ്ടെത്തണമെന്നും പരിശോധിക്കണമെന്നും സംഘടന ആവശ്യപ്പെടുന്നു.
ജയലളിതയുടെ ആശുപത്രി വിവരങ്ങളിലെ ദുരൂഹത ചൂണ്ടിക്കാട്ടി അന്വേഷണം വേണമെന്ന് ചലച്ചിത്ര താരം ഗൗതമി പ്രധാനമന്ത്രിക്ക് കത്തെഴുതിയിരുന്നു. സെപ്തംബര്‍ 22ന് ചെന്നൈയിലെ അപ്പോളോ ആശുപത്രിയില്‍ പ്രവേശിപ്പിച്ച ജയലളിത ഡിസംബര്‍ അഞ്ചിന് രാത്രി 11.30ന് ആണ് അന്തരിച്ചത്. ആരോഗ്യം വീണ്ടെടുക്കുന്നതിനിടയില്‍ പെട്ടെന്നുണ്ടായ ഹൃദയാഘാതമാണ് ജയലളിതയുടെ മരണത്തിന് ഇടയാക്കിയത്.