ജിദ്ദ: സഊദിയുടെ ആറാം നാണയ പരിഷ്‌കരണത്തിന്റെ ഭാഗമായുള്ള പുതിയ നോട്ടുകളും നാണയങ്ങളും ഈ മാസം 26 മുതല്‍ നിലവില്‍ വരുമെന്ന് സഊദി മോണിറ്ററി അതോറിറ്റി(സാമ) ഗവര്‍ണര്‍ ഡോ. അഹ്മദ് അല്‍ ഖുലൈഫ് അറിയിച്ചു. കഴിഞ്ഞ ദിവസമാണ് ഇതു സംബന്ധിച്ച സാമ പ്രഖ്യാപനം നടത്തിയത്.
അമേരിക്കന്‍, ബ്രിട്ടീഷ് കറന്‍സികള്‍ക്ക് തുല്യമായ സുരക്ഷാ ചിഹ്നങ്ങള്‍ ഉള്‍പെടുത്തി രൂപകല്‍നപ ചെയ്തവയാണ് പുതിയ കറന്‍സികള്‍.
സഊദി രാഷ്ട്രപിതാവ് അബ്ദുല്‍ അസീസ് രാജാവിന്റെ ചിത്രങ്ങളാണ് പുതിയ അഞ്ഞൂറിന്റെ നോട്ടിലും രണ്ട് റിയാലിന്റെ നാണയത്തിലുമുള്ളത്.
ഒരു റിയാല്‍ നാണയത്തിലും അഞ്ച്, പത്ത്, അന്‍പത്, നൂറ് നോട്ടുകളിലും തിരുഗേഹങ്ങളുടെ സേവകന്‍ സല്‍മാന്‍ രാജാവിന്റെ ചിത്രമാണുള്ളത്.
ഒന്ന്, അഞ്ച്, പത്ത് ഇരുപത്തിയഞ്ച്, അന്‍പത് എന്നിവയുടെ ഹലാലകളും പുറത്തിറക്കിയിട്ടുണ്ട്. ഒരു റിയാലിന്റെ നോട്ട് ഘട്ടം ഘട്ടമായി വിപണിയില്‍ നിന്ന് പിന്‍വലിക്കുമെന്നും അദ്ദേഹം പറഞ്ഞു.