ബംഗളൂരു:കള്ളപ്പണം സൂക്ഷിച്ചിട്ടുണ്ടെന്ന വിവരത്തെ തുടര്‍ന്ന് പരിശോധനക്കെത്തിയ ആദായ നികുതി ഉദ്യോഗസ്ഥരെ ഓടിക്കാനായി വീട്ടു കാവല്‍ക്കാരിയായ സ്ത്രീ പട്ടിയെ അഴിച്ചു വിട്ടു.

കര്‍ണാടകയിലെ യശ്വന്ത് പുരയിലെ ഒരു അപ്പാര്‍ട്ട്‌മെന്റിലാണ് ഇത്തരമൊരു സംഭവം നടന്നത്. തുടര്‍ന്ന് പൊലിസിന്റേയും അടുത്ത താമസക്കാരുടെയും സഹായത്തോടെ വീട്ടിനുള്ളില്‍ നടത്തിയ പരിശോധനയില്‍ രേഖകളില്ലാത്ത 2.89 കോടി രൂപ പിടിച്ചെടുത്തു.

ഇതില്‍ 2.25 കോടി രൂപയും2000 രൂപ നോട്ടുകളാണ്. പണം സൂക്ഷിച്ച ആളെ പിടികൂടിയിട്ടുണ്ടെങ്കിലും കൂടുതല്‍ വിവരങ്ങള്‍ പുറത്തുവിട്ടിട്ടില്ല.

രഹസ്യവിവരത്തെ തുടര്‍ന്നാണ് പരിശോധന നടത്തിയത്. ഇതിനിടയില്‍ ഡല്‍ഹിയിലെ കരോള്‍ബാഗില്‍ ഒരു ഹോട്ടലില്‍ നടത്തിയ പരിശോധനയില്‍ 3.5 കോടി രൂപ പിടിച്ചെടുത്തു. അസാധുവാക്കിയ നോട്ടുകളാണ് പിടിച്ചെടുത്തത്. ഇതുമായി ബന്ധപ്പെട്ട് അഞ്ചുപേരെ അറസ്റ്റ് ചെയ്തിട്ടുണ്ട്.