കോഴിക്കോട്: ക്രിസ്മസിന് ആഴ്ചകള്‍ക്കു മുന്‍പേ നഗരത്തില്‍ ആഘോഷ വിപണി സജീവമായി. വിവിധയിനം നക്ഷത്രങ്ങളും ക്രിസ്മസ് ട്രീകളും കേക്കുകളുമെല്ലാമായി വിപണി പൊടിപൊടിക്കുകയാണ്. ഇത്തവണയും എല്‍.ഇ.ഡി നക്ഷത്രങ്ങളാണു വിപണിയിലെത്തിയതിലേറെയും. എന്നാല്‍ കടലാസ് നക്ഷത്രങ്ങള്‍ക്കാണ് ആവശ്യക്കാര്‍ കൂടുതല്‍.

നോട്ടു നിരോധനമേര്‍പ്പെടുത്തിയതുമൂലം ചൈനയില്‍ നിന്നെത്തുന്ന എല്‍.ഇ.ഡി സ്റ്റാറുകള്‍ക്കും മറ്റ് അലങ്കാര വസ്തുക്കള്‍ക്കും വില വര്‍ധിച്ചതായി വ്യാപാരികള്‍ പറയുന്നു. എങ്കിലും കച്ചവടം പൊടിപൊടിക്കുന്നുണ്ട്. റിമോര്‍ട്ടില്‍ പ്രവര്‍ത്തിപ്പിക്കാവുന്ന എല്‍.ഇ.ഡി സ്റ്റാറാണ് ഇത്തവണ വിപണയിലെ താരം. 12 നിറങ്ങളില്‍ പ്രവര്‍ത്തിപ്പിക്കാവുന്ന ഇവയുടെ വില 650 രൂപയാണ്. 60 രൂപ മുതല്‍ 250 രൂപ വരെയാണ് മറ്റ് എല്‍.ഇ.ഡി സ്റ്റാറുകളുടെ വില. റീത്ത് സ്റ്റാര്‍, ഫ്രില്‍ സ്റ്റാര്‍, പുല്‍ക്കൂട്, ലാമിനേഷന്‍ സ്റ്റാര്‍, ഫ്‌ളവര്‍ സ്റ്റാര്‍, സ്റ്റിക്കര്‍ സ്റ്റാര്‍, മത്തങ്ങ സ്റ്റാര്‍, വാല്‍നക്ഷത്രം തുടങ്ങിയ പതിവിനങ്ങള്‍ ഇത്തവണയും വിപണിയിലുണ്ട്.

ഒരടി മുതല്‍ 10 അടിവരെ ഉയരത്തിലുള്ള ക്രിസ്മസ് ട്രീകള്‍ വിപണിയിലുണ്ട്. 60 രൂപ മുതല്‍ 1,450 രൂപ വരെയാണ് ഇവയുടെ വില. റെഡിമെയ്ഡ് പുല്‍ക്കൂടുകളും ഇത്തവണയും എത്തിയിട്ടുണ്ട്. 195 മുതല്‍ 1,400 രൂപ വരെയാണ് ഇവയ്ക്കു വില. ഇവയ്‌ക്കൊപ്പം സാന്താക്ലോസ് വേഷങ്ങള്‍, ക്രിസ്മസ് ട്രീ, അതില്‍ തൂക്കിയിടുന്ന വിവിധ വര്‍ണത്തിലുള്ള തോരണങ്ങള്‍, ചെറുനക്ഷത്രങ്ങള്‍, ആശംസാ കാര്‍ഡുകള്‍ തുടങ്ങിയവയും കടകളിലുണ്ട്. നക്ഷത്രങ്ങളും ലൈറ്റുകളും കടകള്‍ക്കു മുന്‍പില്‍ പ്രദര്‍ശിപ്പിച്ചും മറ്റും ആളുകളെ ആകര്‍ഷിപ്പിച്ച് ക്രിസ്മസിന് വിപണി പൊടിപൊടിക്കുകയാണു കച്ചവടക്കാര്‍. പുതിയ സാമ്പത്തിക പരിഷ്‌കരണം ഒരു പരിധിവരെ വിപണിയെ ബാധിക്കുന്നുണ്ടെങ്കിലും ആഘോഷത്തിന്റെ പൊലിവു കുറക്കാന്‍ ആളുകള്‍ക്കു മനസില്ലാത്തത് ആശ്വാസമാണെന്നു കച്ചവടക്കാര്‍ പറയുന്നു.