ഫറോക്ക്: ബി.ടെക് പരീക്ഷ നീട്ടിവച്ചതില്‍ പ്രതിഷേധിച്ച് ടെക്‌നോളജിക്കല്‍ യൂനിവേഴ്‌സിറ്റി വൈസ് ചാന്‍സലര്‍ ഡോ. കുഞ്ചെറിയ പി. ഐസകിനു നേരെ കരിങ്കൊടി കാണിക്കാനുള്ള ശ്രമം പൊലിസ് തടഞ്ഞു.
കാലിക്കറ്റ് യൂനിവേഴ്‌സിറ്റിയില്‍ പരിപാടിയില്‍ പങ്കെടുത്തു മടങ്ങവെ ഫറോക്ക് റെയില്‍വേ സ്റ്റേഷനു സമീപം ഏതാനും എ.ബി.വി.പി പ്രവര്‍ത്തകരാണ് കരിങ്കൊടി കാണിക്കാന്‍ ശ്രമിച്ചത്. കോട്ടയത്തേക്കു പോകാനായി ഇന്നലെ വൈകിട്ടു ആറരയോടെ റെയില്‍വേ സ്റ്റേഷനിലെത്തിയപ്പോഴാണ് സംഭവം. ഫറോക്ക് എസ്.ഐ വി. വിജയരാജന്റെ നേതൃത്വത്തിലുള്ള പൊലിസ് പ്രതിഷേധക്കാരെ കസ്റ്റഡിയിലെടുത്ത് അറസ്റ്റ് രേഖപ്പെടുത്തി വിട്ടയച്ചു.