വാടാനപ്പള്ളി: തളിക്കുളത്ത് കഴിഞ്ഞദിവസം രാത്രിയില്‍ പെയ്ത ശക്തമായ മഴക്കൊപ്പം കൗതുകമായി ആകാശത്ത് നിന്നും മത്സ്യകുഞ്ഞുങ്ങളും.
തളിക്കുളം പുതിയങ്ങാടി ഒന്നാം കല്ലില്‍ പനപ്പറമ്പില്‍ ദിലീപിന്റെ വീട്ട് മുറ്റത്താണ് കഴിഞ്ഞ ദിവസം രാത്രി പെയ്ത മഴക്കൊപ്പം മത്സ്യക്കുഞ്ഞുങ്ങള്‍ വീണത്. പറമ്പിന്റെ പല ഭാഗത്തായാണ് പതിനഞ്ചോളം വരാലിന്‍ (ബ്രാല്‍) കുഞ്ഞുങ്ങളെ കാണപ്പെട്ടത്. ഈ മത്സ്യങ്ങള്‍ക്ക് മൂന്ന് ഇഞ്ചോളം വലുപ്പമുണ്ട്.
പ്രദേശത്ത് കുളങ്ങളൊന്നുമില്ലന്നും മഴ പെയ്യുന്നതിനിടയില്‍ തന്നെയാണ് മത്സ്യങ്ങള്‍ പറമ്പില്‍ വീണതെന്നുമാണ് ദിലീപ് പറയുന്നത്.
മഴയത്ത് ആകാശത്ത് നിന്നും താഴെ വീണ മത്സ്യക്കുഞ്ഞുങ്ങളെ കാണാന്‍ നിരവധി പേരാണ് ഇവിടെയെത്തുന്നത്.