കൊച്ചി :  കേരളാ ബാര്‍ കൗണ്‍സിലിന്റെ നേതൃത്വത്തില്‍ എറണാകുളം ടൗണ്‍ ഹാളില്‍ സംഘടിപ്പിച്ച നവാഗതരായ അഭിഭാഷകരുടെ സന്നദ് ദാന ചടങ്ങില്‍ ബിരുദം സ്വീകരിക്കാനെത്തിയവരില്‍ അധ്യാപകരും ജീവനക്കാരും .
സ്വീകര്‍ത്താക്കളില്‍ അധികവും യുവാക്കളായിരുന്നെങ്കിലും വേറിട്ട കാഴ്ചകളായിരുന്നു എല്‍.ഐ.സിയില്‍നിന്നും സ്വയം വിരമിച്ച് നിയമ പഠനം പൂര്‍ത്തിയാക്കിയ തിരുവന്തപുരം സ്വദേശിയായ രാജശേഖരന്‍ നായരും മലബാര്‍ കൃസ്ത്യന്‍ കോളജ് മുന്‍ പ്രിന്‍സിപ്പള്‍ മേരി ഗ്ലാഡിയും.
സര്‍വീസില്‍ തുടരാന്‍ അഞ്ചുവര്‍ഷം ബാക്കിനില്‍ക്കെയാണ് രാജശേഖരന്‍ നായര്‍ സ്വയം വിരമിച്ച് അഭിഭാഷകനാകാന്‍ തയ്യറായത്.
സേവനമേഖലയില്‍ പ്രവര്‍ത്തിച്ചതിനാല്‍ നിയമത്തിന്റെ കുരുക്കില്‍പ്പെട്ട് ഒടുവില്‍ നീതിലഭിക്കാതെ പോയ അനേകം കേസുകളെ കുറിച്ച് തനിക്ക് നേരിട്ടറിവുണ്ട്. പണത്തിന്റെയും സ്വാധീനത്തിന്റെയും പേരില്‍ സാധാരണക്കാരന് നിയമത്തിന്റെ ഏഴയലത്തുപ്പോലും എത്താന്‍ കഴിയാത്ത സാഹചര്യമാണ് ഇന്നുളളത്.
 പ്രത്യേകിച്ചും വാഹനാപകടങ്ങളില്‍പ്പെട്ട് കഷ്ടത അനുഭവിക്കുന്ന അനേകര്‍ ചികില്‍സപ്പോലും നടത്താന്‍ കഴിയാത്ത അവസ്ഥയിലാണ്. വര്‍ഷങ്ങള്‍ നീളുന്ന വിചാരണക്കൊടുവില്‍ നാമമാത്ര നഷ്ടപരിഹാരത്തില്‍ ഒതുങ്ങി കേസുകള്‍ ഒത്തുതീര്‍പ്പിലെത്തുകയും ചെയ്യുന്നുണ്ട്. ഇതിന് അറുതി വരുത്തേണ്ടതുണ്ട്. തങ്ങള്‍ നിയമബിരുദം നേടിയത് സാധാരണക്കാരന്റെ ആശങ്കയ്ക്ക് അല്പമെങ്കിലും വിരാമം കുറിക്കാനാണ്. ഇത് വരുനാളുകളില്‍ പ്രാവര്‍ത്തികമാക്കാന്‍ ശ്രമിക്കും. പതിറ്റാണ്ടുകളുടെ അധ്യാപകവൃത്തിക്കുശേഷമാണ് മേരി ഗ്ലാഡിയും നിയമ ബിരുദം സ്വീകരിക്കാനെത്തിയത്.
ഈ അധ്യാപികയുടെ ദൗത്യവും സാധാരണക്കാരന് നിയമം സഹായം ചെയ്യലാണ്. പണത്തിന്റെ അഭാവത്തില്‍ നിയമം സാധാരണക്കാര്‍ക്ക് നിഷേധിക്കപ്പെടരുതെന്ന് ഈ അധ്യാപികയും ആഗ്രഹിക്കുന്നു.