കൊടുവള്ളി: ദേശീയപാത-212ല്‍ വാവാട് ഓട്ടോയില്‍ ബൈക്കിടിച്ച് രണ്ടു വിദ്യാര്‍ഥികള്‍ക്ക് പരുക്ക്.
ഡിഗ്രി വിദ്യാര്‍ഥികളായ കത്തറമ്മല്‍ മേത്തല്‍തൊടുകയില്‍ ഫവാസ് (18), തേങ്ങാക്കൂട്ടില്‍ ഷാനിദ് (18) എന്നിവര്‍ക്കാണ് പരുക്കേറ്റത്. ഇരുമോത്ത് ജുമാമസ്ജിദിനു സമീപം ഇന്നലെ വൈകിട്ട് 4.30 ഓടെയായിരുന്നു അപകടം. താമരശ്ശേരി ഭാഗത്തേക്കു പോവുകയായിരുന്ന ഓട്ടോ ആര്‍.ടി.ഒയുടെ വാഹന പരിശോധന ഭയന്ന് തിരിക്കുന്നതിനിടെ പിറകിലുള്ള ബൈക്കില്‍ ഇടിക്കുകയായിരുന്നു.
അപകടം നടന്നയുടന്‍ ഓട്ടോ ഡ്രൈവര്‍ ഓടി രക്ഷപ്പെട്ടു. സമീപത്തു വാഹന പരിശോധന നടത്തുകയായിരുന്ന ആര്‍.ടി.ഒയുടെ വാഹനത്തിലാണ് പരുക്കേറ്റവരെ ആശുപത്രിയിലെത്തിച്ചത്.
മാസങ്ങള്‍ക്ക് മുന്‍പ് ആര്‍.ടി.ഒയുടെ വാഹനം മറ്റൊരു ബൈക്കിനെ തടഞ്ഞു നിര്‍ത്താനുള്ള ശ്രമത്തിനിടെ ബൈക്ക് മറിഞ്ഞ് രണ്ടുപേര്‍ക്ക് പരുക്കേറ്റിരുന്നു.