പേരാമ്പ്ര: ചക്കിട്ടപ്പാറ ഗ്രാമ പഞ്ചായത്തില്‍ പക്ഷിപനിയെന്ന ആശങ്കയില്‍ കര്‍ഷകര്‍. നരിനട റോഡില്‍ കോമത്ത് പാറ വയലില്‍ കൊക്കുകള്‍ ചത്തൊടുങ്ങുന്നതിനെ തുടര്‍ന്ന് വയലില്‍ കൃഷിയിറക്കുന്ന കര്‍ഷകരും പ്രദേശവാസികളുമാണ് ആശങ്കയോടെ കഴിയുന്നത്. കൊക്കുകള്‍ക്ക് പുറമെ ദേശാടന പക്ഷികളായെത്തുന്ന വിവിധയിനത്തില്‍ പെട്ട പക്ഷികളും ചത്തൊടുങ്ങുന്നതായിട്ടാണ് വിവരം. പുലര്‍ച്ചെ വയലില്‍ എത്തുന്ന കര്‍ഷകര്‍ ചത്ത കൊക്കുകളുടെ അവശിഷ്ടങ്ങള്‍ മൃഗങ്ങങ്ങളും പരുന്തുകളും കൊത്തി വലിച്ചിട്ട നിലയിലാണ് കാണുന്നത്. മൃഗസംരക്ഷണ ഉദ്യോഗസ്ഥരെ വിവരമറിയിച്ചതിനെ തുടര്‍ന്ന് നടത്തിയ പരിശോധനയില്‍ ചത്തൊടുങ്ങിയതാണെന്ന സൂചനയാണ് ലഭിച്ചത്. കുടുതല്‍ പരിശോധന നടത്തിയാലെ പക്ഷിപ്പനിയാണോ എന്ന് സ്ഥിരീകരിക്കാന്‍ കഴിയൂവെന്ന് വെറ്ററിനറി ജീവനക്കാര്‍ പറഞ്ഞു. എന്നാല്‍ പാടശേഖരത്തില്‍ മേയാന്‍ വിട്ട പശുക്കള്‍ക്കും കോഴികള്‍ക്കും പനി ബാധിക്കുമോ എന്ന ആശങ്കയിലാണ് പ്രദേശവാസികള്‍ . കുടുതല്‍ പരിശോധന നടത്തിയാലെ വിശദമായ വിവരങ്ങള്‍ നല്‍കാനാകു എന്ന് മൃഗസംരക്ഷണ ഉദ്യോഗസ്ഥര്‍ പറഞ്ഞു.