കണ്ണൂര്‍: ഉത്തരമേഖലാ ആര്‍മി റിക്രൂട്ട്‌മെന്റ് റാലി ഇന്നും നാളെയുമായി കണ്ണൂര്‍ പൊലിസ് മൈതാനിയില്‍ നടക്കും. സോള്‍ജ്യര്‍ ടെക്‌നിക്കല്‍, റിലീജ്യസ് ടീച്ചേഴ്‌സ് ജൂനിയര്‍ കമ്മിഷന്‍ഡ് ഓഫിസര്‍ തസ്തികകളിലേക്ക് ഓണ്‍ലൈനായി അപേക്ഷ നല്‍കിയ 4728 പേരാണ് ഇന്നു രാവിലെ നാലു മുതല്‍ ആരംഭിക്കുന്ന റിക്രൂട്ട്‌മെന്റ് നടപടികള്‍ക്കായി എത്തിച്ചേരുക. സര്‍ട്ടിഫിക്കറ്റുകള്‍ പരിശോധിച്ച ശേഷം യോഗ്യരായവരെ കായികക്ഷമതാ പരിശോധനയില്‍ പങ്കെടുപ്പിക്കും. തെരഞ്ഞെടുക്കപ്പെടുന്നവര്‍ക്കുള്ള മെഡിക്കല്‍ പരിശോധന 17, 18 തിയതികളില്‍ നടക്കും. റാലിയില്‍ പങ്കെടുക്കുന്നവര്‍ പ്ലാസ്റ്റിക് കാരി ബാഗുകള്‍, പ്ലാസ്റ്റിക് കുപ്പികള്‍, പ്ലാസ്റ്റിക് കവറുകളില്‍ പൊതിഞ്ഞ ഭക്ഷണ പദാര്‍ഥങ്ങള്‍ തുടങ്ങിയവ ഗ്രൗണ്ടിലേക്ക് കൊണ്ടുവരാന്‍ പാടില്ലെന്ന് സംഘാടകര്‍ അറിയിച്ചു.