കാളികാവ്: മലയോരത്ത് രൂക്ഷമാകുന്ന വെള്ളക്ഷാമത്തിന് പരിഹാരമായി 25 തടണകള്‍ നിര്‍മിച്ചു. ചോലകള്‍ ഉള്‍പ്പെടെ വറ്റിയതിനെത്തുടര്‍ന്നാണ് വെള്ളക്ഷാമം രൂക്ഷമായത്. കടുത്തനിയന്ത്രണങ്ങള്‍ക്കിടയിലും മറ്റു മാര്‍ഗങ്ങളില്ലാത്തതിനാലാണ് ഗ്രാമപഞ്ചായത്തുകള്‍ തടയണ കെട്ടുന്നത്. ചാക്കില്‍ കല്ലും മണലും നിറച്ചാണ് കഴിഞ്ഞ വര്‍ഷം വരെ തടയണനിര്‍മിച്ചിരുന്നത്.
തടയണക്ക് പ്ലാസ്റ്റിക് ചാക്ക് ഉപയോഗിക്കുന്നത് കഴിഞ്ഞവര്‍ഷം നിരോധിച്ചിരുന്നു. ചണച്ചാക്ക് ഉപയോഗിക്കാനുള്ള അനുമതിയും ഈ വര്‍ഷം ഒഴിവാക്കിയിട്ടുണ്ട്. വെള്ളം കൂടുമ്പോള്‍ തടയണ കെട്ടുന്ന വസ്തുക്കള്‍ പ്രധാനനദികളിലും തുടര്‍ന്ന് അറബിക്കടലിലും ഒഴുകിചേരുന്നതിനാലാണ് നിയന്ത്രണം. ചോക്കാടന്‍ പുഴ, കോട്ടപ്പുഴ, കാളികാവ് പുഴ എന്നിവിടങ്ങിലായിട്ടാണ് 25 തടയണകള്‍ നിര്‍മിച്ചിട്ടുള്ളത്. കവുങ്ങിന്‍തടിയും കവുങ്ങിന്‍ പട്ട, പരുത്തി ചെടിയുടെ കൊമ്പുകള്‍ എന്നിവ കൊണ്ട് കെട്ടിയതിന് ശേഷം പുഴങ്കല്ല് നിറച്ചാണ് തടയണ നിര്‍മിക്കുന്നത്. തൊഴിലുറപ്പ് തൊഴിലാളികളാണ് നിര്‍മാണം നടത്തുന്നത്.
വേനല്‍തുടങ്ങും മുമ്പ് തന്നെ വരള്‍ച്ച അനുഭവപ്പെട്ടുത്തുടങ്ങിയതിനെ തുടര്‍ന്നാണ് തടയണ നിര്‍മിക്കുന്നതെന്ന് അധികൃതര്‍ പറഞ്ഞു. ചാക്ക് ഉപയോഗിക്കാതെ നിര്‍മിക്കുന്ന തടയണകള്‍ ഉപയോഗപ്രദമാകുമോ എന്ന കാര്യത്തില്‍ അധികൃതര്‍ക്ക് സംശയമുണ്ട്. പുഴകളിലെ ഇപ്പോഴുള്ള ജലനിരപ്പ് നിലനിര്‍ത്താനായത് കുടിവെള്ള പ്രശ്‌നത്തിനുള്ള പരിഹാരമാകുമെന്ന് അധികൃതര്‍ പറഞ്ഞു.
ചോലകള്‍ കൂടി വറ്റിയതിനാല്‍ പുഴയില്‍ നിന്ന് കാര്‍ഷിക ആവശ്യങ്ങള്‍ക്ക് വെള്ളമെടുക്കുന്നത് കൂടി നിയന്ത്രിക്കാനാണ് തീരുമാനം ഗ്രാമപഞ്ചായത്തിന് പുറമെ പ്രദേശവാസികളും തടയണ നിര്‍മിച്ച് വെള്ളം തടഞ്ഞ് നിര്‍ത്താനുള്ള ശ്രമം നടത്തുന്നുണ്ട്. ചോക്കാട് ആനക്കല്ല് വാര്‍ഡില്‍ ഗ്രാമ പഞ്ചായത്തംഗം നസീമ, പാത്തുമ്മ, സൈനബ, സുബൈദ, ശകുന്തള, കാളി തുടങ്ങിയവടെ നേതൃത്വത്തില്‍ ചോക്കാടന്‍ പുഴക്ക് കുറുകെ മരുതുങ്ങല്‍ കടവ്, കൂട്ടര്‍പ്പെട്ടി നിസ്‌കാര പള്ളി പടി, അത്തിക്കുണ്ട് അമ്മിണിപ്പടി എന്നിവിടങ്ങളില്‍ തടയണകള്‍ നിര്‍മിച്ചു കഴിഞ്ഞു.