പള്ളിക്കല്‍: പള്ളിക്കല്‍ ബസാര്‍ മഹല്ല് ജുമാമസ്ജിദില്‍ പ്രാര്‍ഥനാസമയത്ത് മാരാകായുധങ്ങളുമായെത്തി നിസ്‌കരിക്കാന്‍ നിന്നവരെ അക്രമിച്ച് മാരകമായി പരുക്കേല്‍പിക്കുകയും പള്ളിക്കും തൊട്ടടുത്ത മദ്‌റസക്കും വന്‍ നാശനഷ്ടങ്ങള്‍ വരുത്തുകയും ചെയ്തവര്‍ക്കെതിരേ മഹല്ല് സെക്രട്ടറി കെ ലിയാക്കത്തലി നല്‍കിയ പരാതിയില്‍ മൂന്ന് ദിവസമായിട്ടും നടപടിയായില്ല.
കാന്തപുരത്തിന്റെ സംഘടനാപ്രവര്‍ത്തകരാണ് കഴിഞ്ഞ ബുധനാഴ്ച മഗ്‌രിബ് നിസ്‌കാരിക്കാനെത്തിയവരെ മാരകായുധങ്ങളുമായെത്തി വധിക്കാന്‍ ശ്രമിച്ചത്. ആക്രമണത്തില്‍ പരുക്കേറ്റ ഇരുപതോളം പേര്‍ ചികിത്സയിലാണ്. പള്ളിക്കകത്തെ നിരീക്ഷണ കാമറ തകര്‍ക്കുകയും വിലപിടിപ്പുള്ള ഉപകരണങ്ങള്‍ മോഷ്ടിക്കപ്പെടുകയും ചെയ്തിട്ടുണ്ട്. പള്ളിയുടെ ജനലുകളും വാതിലുകളും ഉള്‍പ്പെടെ പള്ളിക്കകത്തെ ഫര്‍ണിച്ചറുകള്‍ പൂര്‍ണമായും തകര്‍ന്നനിലയിലാണ്. ഏകദേശം ഒന്നരലക്ഷം രൂപയുടെ നഷ്ടമുള്ളതായി കമ്മിറ്റി ഭാരവാഹികള്‍ പറഞ്ഞു. സംഭവം നടന്ന് ദിവസങ്ങള്‍ കഴിഞ്ഞിട്ടും പരിശോധിച്ച് നാശനഷ്ടം കണക്കാക്കാന്‍ പൊലിസ് തയാറായിട്ടില്ല. പള്ളിയിലെ നിരീക്ഷണ കാമറയില്‍ നിന്നു പ്രതികളെ കുറിച്ചുള്ള പൂര്‍ണവിവരം തെളിവ്‌സഹിതം ലഭിക്കുമെന്നുള്ളത് കൊണ്ടാണ് നിരീക്ഷണ കാമറ അക്രമികള്‍ കൊണ്ടുപോയത്. കാമറ മോഷ്ടിച്ചവരെ കുറിച്ച് സൂചന നല്‍കിയിട്ടും അവ കണ്ടെത്താന്‍ പോലും പൊലിസ് തയാറായില്ലെന്ന് നാട്ടുകാര്‍ ആക്ഷേപമുന്നയിക്കുന്നു. വ്യാജപരാതികള്‍ ഉണ്ടാക്കി നിരപരാധികള്‍ക്കെതിരേ ഭരണസ്വാധീനം ഉപയോഗിച്ച് പൊലിസിനെകൊണ്ട് കേസെടുപ്പിക്കാനുള്ള ശ്രമം നടക്കുന്നതായും ആക്ഷേപം ഉയര്‍ന്നിട്ടുണ്ട്. അതേ പൊലിസിന്റെ നിഷ്‌ക്രിയത്വത്തിനും പക്ഷപാതത്തിനുമെതിരേ വ്യാപകപ്രതിഷേധമുയരുന്നുണ്ട്.