ആലക്കോട്: അനധികൃതമായി പുഴയില്‍ നിന്നു മുറിച്ചു മാറ്റിയ മരങ്ങള്‍ പഞ്ചായത്ത് അധികൃതര്‍ പിടികൂടി. മണക്കടവ് മൂരിക്കടവ് പുഴയില്‍ നിന്നാണ് സ്വകാര്യ വ്യക്തി മരങ്ങള്‍ മുറിച്ചു മാറ്റിയത്. ഇയാള്‍ക്കെതിരേ നിയമ നടപടി സ്വീകരിക്കുമെന്ന് പഞ്ചായത്ത് അധികൃതര്‍ പറഞ്ഞു.
പുഴയിലെ ഈറ്റക്കാടുകള്‍ക്കിടയിലുണ്ടായിരുന്ന ആറു വന്‍മരങ്ങളാണ് യന്ത്രങ്ങള്‍ ഉപയോഗിച്ച് മുറിച്ചു മാറ്റിയത്. വിവരമറിഞ്ഞ പ്രദേശത്തെ ചിലരാണ് പഞ്ചായത്ത് അധികൃതരെ വിവരമറിയിച്ചത്. അധികൃതര്‍ സ്ഥലത്തെത്തി വാഹനം തടയുകയും മരം കസ്റ്റഡിയില്‍ എടുക്കുകയും ചെയ്തു. മരം മുറിച്ചു മാറ്റിയ സ്ഥലവും ഉദ്യോഗസ്ഥര്‍ സന്ദര്‍ശിച്ചു. പുഴയോരം അളന്നു തിട്ടപ്പെടുത്താത്തതിനാല്‍ നിരവധി മരങ്ങളാണ് ഉദയഗിരി പഞ്ചായത്തിന്റെ പുഴയോരത്തു നിന്നും അനധികൃതമായി മുറിച്ചു നീക്കുന്നത്.