ഇരിട്ടി: ആറളം കോക്കാട്ട് കാട്ടാനക്കൂട്ടം ജനവാസ കേന്ദ്രത്തില്‍ ഇറങ്ങിയതിനെത്തുടര്‍ന്ന് വ്യാപക കൃഷി നാശം. മേഖലയിലെ പത്തോളം കര്‍ഷകരുടെ റബ്ബര്‍, വാഴ, തെങ്ങ്, മരച്ചീനി തുടങ്ങി വിവിധയിനം പച്ചക്കറികള്‍ അടക്കമുള്ള കാര്‍ഷിക വിളകളാണ് കാട്ടാനകള്‍ നശിപ്പിച്ചത്. ആറളം വനത്തില്‍ നിന്നു ആറളം ഫാമും കടന്നെത്തിയ കുട്ടിക്കൊമ്പന്‍ അടങ്ങിയ നാലോളം ആനകളാണ് വ്യാപക നാശം വിതച്ചത്.
വനത്തില്‍ നിന്നു കിലോമീറ്ററുകള്‍ക്കിപ്പുറത്തുള്ള ജനവാസ മേഖലയില്‍ താമസിക്കുന്ന കോക്കാട്ടെ ടി.കെ ജോര്‍ജിന്റെ വീട്ടുമുറ്റം വരെ എത്തിയ ആനകള്‍ നൂറോളം വാഴകള്‍ പൂര്‍ണമായും നശിപ്പിച്ചു. കുരുമുളക് വള്ളികളും വീട്ടുപറമ്പിലെ പൈപ്പുകളും തകര്‍ത്തു.
പുത്തന്‍ പുരക്കല്‍ തങ്കച്ചന്റെ റബ്ബര്‍, മരച്ചീനി, വെള്ളരിങ്ങാട്ട് ലിസ്സി, പുത്തന്‍ പുരക്കല്‍ റെജി, പുത്തന്‍ പുരക്കല്‍ ഷാന്റി, മോളി, ജിഷ, വെള്ളരിങ്ങാട്ട് അലക്‌സ് എന്നിവരുടെ പച്ചക്കറികള്‍, റബ്ബര്‍, വാഴ എന്നിവയും വ്യാപകമായി നാശിപ്പിച്ചു. പലരുടെയും തീറ്റപ്പുല്‍ കൃഷിയും നശിപ്പിക്കപ്പെട്ടു. എന്നാല്‍ സംഭവം കഴിഞ്ഞ് മണിക്കൂറുകള്‍ കഴിഞ്ഞിട്ടും വനപാകര്‍ ഇവിടെ തിരിഞ്ഞ് നോക്കിയില്ലെന്നും ആക്ഷേപമുണ്ട്.