കൊല്ലം: കലാഭവന്‍ മണിക്ക് അര്‍ഹിക്കുന്ന ആദരവ് അര്‍പ്പിക്കാതിരുന്നതോടെ തലസ്ഥാനത്ത് നടന്ന രാജ്യാന്തര ചലച്ചിത്രോത്സവം ജാതിവിവേചനത്തിന്റെ മേളയായെന്ന് കേരളാ ദലിത് ഫെഡറേഷന്‍ (കെ.ഡി.എഫ്)സംസ്ഥാന പ്രസിഡന്റ് പി.രാമഭദ്രന്‍ പറഞ്ഞു. കേരള ദലിത് യുവജന ഫെഡറേഷന്‍(കെ.ഡി.വൈ.എഫ്) സംസ്ഥാന നേതൃസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
ആദ്യ മലയാള ചലച്ചിത്രമായ വിഗതകുമരാനിലെ നായികയായ പുലയസമുദായത്തില്‍പ്പെട്ട പി.കെ.റോസിയെ നാടുകടത്തിയവരുടെ പിന്മുറക്കാര്‍ ഇപ്പോള്‍ സനിമയുടെ അരങ്ങത്തും തിരശീലയ്ക്ക് പിന്നിലും വളരെ ശക്തമാണ്. സിനിമയിലെ ജാതിവിവേചനത്തിന്റെ തിക്തഫലങ്ങള്‍ മഹാനടന്‍ തിലകന്‍ തന്നോട് നേരിട്ട് വിശദീകരിച്ചിട്ടുണ്ട്. ദേശീയ തലത്തില്‍ അംഗീകാരം നേടിയതും കലാഭവന്‍ മണിയുടെ അഭിനയ മികവ് കൊണ്ട് ചരിത്രത്തില്‍ ഇടംനേടുകയും ചെയ്ത വാസന്തിയും ലക്ഷ്മിയും പിന്നെ ഞാനും എന്ന ചലച്ചിത്രം മേളയില്‍ പ്രദര്‍ശിപ്പിക്കാതിരുന്നത് തികഞ്ഞ അവണനയാണ്. മണിയോടല്ല സംവിധായകന്‍ വിനയനോടാണ് പകയെന്ന തരത്തില്‍ തല്‍പര കക്ഷികള്‍ പ്രചരിപ്പിക്കുന്നുണ്ട്. മുഖ്യധാരയിലെ ആധിപത്യങ്ങളെ വെല്ലുവിളിച്ചുകൊണ്ട് ഒരിക്കലും സിനിമയില്‍ മുഖം കാണിക്കാന്‍ അവസരം ലഭിക്കില്ലെന്ന് കരുതിയ ഒട്ടേറെ കലാകാരന്മാരെ അംഗീകരിച്ച് വളര്‍ത്തിയ വിനയനെയും അവഹേളിക്കാന്‍ പാടില്ലാത്തതാണ്. സി.പി.എമ്മിനോട് ശക്തമായി ആഭിമുഖ്യം ഉണ്ടായിരുന്നിട്ടും സര്‍ക്കാര്‍ നിയന്ത്രണത്തിലുള്ള ചലച്ചിത്ര അക്കാദമി കലഭവന്‍ മണിയോട് കാട്ടിയ നിന്ദയും വിവേചനവും മാപ്പര്‍ഹിക്കുന്നതല്ലെന്നും പി.രാമഭദ്രന്‍ പറഞ്ഞു.
കെ.ഡി.വൈ.എഫ് സംസ്ഥാന പ്രസിഡന്റ് ബോബന്‍ ജി.നാഥ് അധ്യക്ഷനായി. എ. രതീഷ്, ദേവദാസ് കുതിരാടം, സുബ്രഹ്മണ്യന്‍ പാണ്ടിക്കാട്, കെ.മദനന്‍, കെ.ഭരതന്‍, ഡോ.കെ.ബാബു, കാവുവിള ബാബുരാജന്‍, വി.ആര്‍.ബൈജു, എന്‍.ഷാജി, മോഹന്‍ പുത്തൂര്‍, കെ. ശിവദാസന്‍, ആര്‍. രാധാകൃഷ്ണന്‍ എന്നിവര്‍ സംസാരിച്ചു. 2017 ഫെബ്രുവരി 11, 12 തീയതികളില്‍ പാലക്കാട് വച്ച് നടക്കുന്ന കെ.ഡി.എം.എഫ് സംസ്ഥാന സമ്മേളനം വിജയിപ്പിക്കാനും നേതൃസമ്മേളനം തീരുമാനിച്ചു.