ബ്രിസ്‌ബെയ്ന്‍: ആസ്‌ത്രേലിയക്കെതിരായ ഒന്നാം ക്രിക്കറ്റ് ടെസ്റ്റില്‍ പാകിസ്താനു കൂട്ടത്തകര്‍ച്ച. ആസ്‌ത്രേലിയ ആദ്യ ഇന്നിങ്‌സില്‍ പടുത്തുയര്‍ത്തിയ 429 റണ്‍സിനു മറുപടിയുമായി ഇറങ്ങിയ പാകിസ്താന്‍ രണ്ടാം ദിനം കളി നിര്‍ത്തുമ്പോള്‍ എട്ടു വിക്കറ്റ് നഷ്ടത്തില്‍ 97 റണ്‍സെന്ന ദയനീയ സ്ഥിതിയില്‍. രണ്ടു വിക്കറ്റ് മാത്രം ശേഷിക്കേ പാകിസ്താന്‍ ഫോളോ ഓണ്‍ ഭീഷണിയിലാണ്. ഓസീസ് സ്‌കോറിനൊപ്പമെത്താന്‍ അവര്‍ക്ക് 332 റണ്‍സ് കൂടി വേണം. 31 റണ്‍സോടെ സര്‍ഫ്രാസ് അഹമ്മദും എട്ടു റണ്‍സോടെ മുഹമ്മദ് ആമിറുമാണ് ക്രീസില്‍. സര്‍ഫ്രാസാണ് പാക് നിരയിലെ ടോപ് സ്‌കോററും.
സര്‍ഫ്രാസിനെ പുറമേ സമി അസ്‌ലം (22), ബാബര്‍ അസം (19) എന്നിവരാണ് രണ്ടക്കം കടന്ന മറ്റു ബാറ്റ്‌സ്മാന്‍മാര്‍. മൂന്നു വിക്കറ്റ് വീതം നേടിയ ജോഷ് ഹേസ്‌ലെവുഡ്, മിച്ചല്‍ സ്റ്റാര്‍ക്ക് എന്നിവരാണ് പാകിസ്താനെ തകര്‍ത്തത്. ജാക്‌സന്‍ ബേഡ് രണ്ടു വിക്കറ്റ് നേടി.
നേരത്തെ നായകന്‍  സ്റ്റീവന്‍ സ്മിത്ത് (130), പീറ്റര്‍ ഹാന്‍ഡ്‌കോം (105) എന്നിവരുടെ സെഞ്ച്വറി കരുത്തിലാണ് ഓസീസ്  429 റണ്‍സെന്ന മികച്ച സ്‌കോറിലെത്തിയത്. പാകിസ്താനു വേണ്ടി മുഹമ്മദ് റിയാസും മുഹമ്മദ് ആമിറും നാലു വീതം വിക്കറ്റുകള്‍ വീഴ്ത്തി.