കേപ് ടൗണ്‍: ടീം ടോട്ടല്‍ 169 റണ്‍സ്. അതില്‍ 160 റണ്‍സും ഒറ്റ താരത്തിന്റെ ബാറ്റില്‍ നിന്ന്. ഒന്‍പത് റണ്‍സ് എക്‌സട്രാ ഇനത്തില്‍ ! ദക്ഷിണാഫ്രിക്കയിലെ ദേശീയ ക്രിക്കറ്റ് വീക്‌സ് ടി20 അണ്ടര്‍ 19 പെണ്‍കുട്ടികളുടെ മത്സരത്തില്‍ എംപുമലംഗ- ഈസ്റ്റേണ്‍ ടീമുകളുടെ പോരാട്ടത്തിലാണ് ഈ അത്ഭുത പ്രകടനം.
എംപുമലംഗ ഓപണര്‍ ഷാനിയ ലീ സ്വാര്‍ടാണ് 160 റണ്‍സെടുത്ത് ടീമിനെ ഒറ്റയ്ക്ക് മികച്ച സ്‌കോറിലേക്ക് നയിച്ചത്. എട്ടു താരങ്ങള്‍ സംപൂജ്യരായി മടങ്ങിയപ്പോള്‍ പത്താം സ്ഥാനത്തിറങ്ങിയ താരം റണ്‍സൊന്നുമെടുക്കാതെ പുറത്താകാതെ നിന്നു ഒരു താരം കളത്തിലിറങ്ങിയില്ല.
ടീം ടോട്ടല്‍ എട്ടു വിക്കറ്റ് നഷ്ടത്തില്‍ 169 റണ്‍സ്. ഓപണറായി ഇറങ്ങിയ ഷാനിയ പുറത്താകാതെ 86 പന്തില്‍ 18 ഫോറും 12 സിക്‌സും പറത്തിയാണ് 160 അടിച്ചെടുത്തത്. ബാക്കിയുള്ള പത്തു താരങ്ങളും ചേര്‍ന്ന് ടീമിനു സംഭാവന ചെയ്ത റണ്‍ പൂജ്യം!
മറുപടി ബാറ്റിങിനിറങ്ങിയ ഈസ്റ്റേണ്‍സ് 128 റണ്‍സില്‍ പോരാട്ടം അവസാനിപ്പിച്ചു. എംപുമലംഗയ്ക്ക് 42 റണ്‍സ് വിജയം. 21 റണ്‍സ് വഴങ്ങി ഷാനിയ രണ്ടു വിക്കറ്റുമെടുത്തു പന്തു കൊണ്ടും നിര്‍ണായക സാന്നിധ്യമായി.