ജിദ്ദ: സഊദിയല്‍ നിന്ന് വിദേശികള്‍ സ്വദേശത്തേക്ക് അയക്കുന്ന പണത്തിന് നികുതി ബാധകമാക്കുന്നതിനെ കുറിച്ച് ശൂറാ കൗണ്‍സില്‍ പഠനം നടത്തുന്നതായി റിപ്പോര്‍ട്ട്. ഇതു സംബന്ധിച്ചുള്ള പഠനം ധന കമ്മിറ്റിയുടെ നേതൃത്വത്തിലാണ് നടക്കുന്നത്. 12 വകുപ്പുകളാണ് കരടു നിയമത്തിലുള്ളത്. 

സഊദിയില്‍ സമ്പാദിക്കുന്ന പണം ഇവിടെ തന്നെ ചെലവഴിക്കുന്നതിനും സഊദിയില്‍ നിക്ഷേപം നടത്തുന്നതിനും വിദേശികളെ പ്രോത്സാഹിപ്പിക്കുന്നതിനാണ് നിയമം ലക്ഷ്യമിടുന്നതെന്നും ശൂറാ കൗണ്‍സില്‍ അംഗം പറഞ്ഞു. വിദേശികള്‍ അനധികൃത രീതിയില്‍ അധിക ജോലികള്‍ നിര്‍വഹിച്ചു കൂടുതല്‍ പണം സമ്പാദിക്കുന്ന പ്രവണത തടയുകയാണ് മറ്റൊരു ലക്ഷ്യമെന്നും അദ്ദേഹം പറഞ്ഞു.

നിയമാനുസൃത തൊഴിലവസരങ്ങള്‍ വര്‍ധിപ്പിക്കുന്നതിനും ദേശീയ സമ്പദ് വ്യവസ്ഥ നേരിടുന്ന നിരവധി പ്രശ്‌നങ്ങള്‍ക്ക് പരിഹാരം കാണുന്നതിനും ഇതിലൂടെ സാധിക്കുമെന്നാണ് കരുതുന്നത്, നിലവില്‍ സഊദിയില്‍ ജോലി ചെയ്യുന്ന വിദേശികള്‍ അയക്കുന്ന പണത്തിന് പ്രത്യേക നികുതിയും ഫീസും നല്‍കേണ്ടതില്ല.

വിദേശികള്‍ക്ക് നികുതി ചുമത്താന്‍ നിലവില്‍ നീക്കമില്ലെന്ന് സഊദി മോണിറിറ്റി അടുത്തിടെ വ്യക്തമാക്കിയിരുന്നു. നിലവില്‍ വിദേശികള്‍ 16000 കോടികള്‍ക്ക് മുകളില്‍ റിയാല്‍ അവരുടെ സ്വദേശങ്ങളിലേക്ക് പ്രതിമാസം അയക്കുന്നുണ്ടെന്നാണ് കണക്ക്.