ആലത്തൂര്‍: ദേശീയപാത സ്വാതി ജങ്ഷനു സമീപം സര്‍വ്വീസ് റോഡില്‍ മൂന്ന് ലോറികള്‍ കൂട്ടിയിടിച്ച് ആറു പേര്‍ക്ക് പരിക്കേറ്റു. ഇന്നലെ പുലര്‍ച്ചെ നാലിനാണ് അപകടം. കിണ്ടിമുക്കില്‍നിന്ന് സര്‍വീസ് റോഡ് വഴി ദേശീയ പാതയിലേക്ക്  കയറുന്ന ഭാഗത്താണ് അപകടം. തമിഴ്‌നാട് പുതുക്കോട്ടൈ അന്‍പരശന്‍ (25), അങ്കമാലി മേലൂര്‍ ജെയ്‌സണ്‍ (45), കോട്ടയം കിടങ്ങൂര്‍ സ്വദേശി വര്‍ഗീസ് (72), സേലം സ്വദേശികളായ മണിശേഖര്‍ (25), ആനന്ദ് രാജ് (23), ഗണേശന്‍ (25) എന്നിവര്‍ക്കാണ് പരുക്കേറ്റത്. ഇവരെ ആലത്തൂര്‍ താലൂക്കാശുപത്രിയില്‍ പ്രവേശിപ്പിച്ചു. തൃശൂര്‍ ഭാഗത്തേക്ക് ബിയര്‍ കയറ്റി പോവുകയായിരുന്ന ലോറി ഹമ്പ് കണ്ടപ്പോള്‍ നിര്‍ത്തിയതാണ് അപകട കാരണമെന്ന് പറയുന്നു. ബിയര്‍ ലോറിക്കു പിന്നില്‍ ടാങ്കര്‍ ലോറിയും അതിനു പിന്നില്‍ സിമന്റ് കയറ്റിയ ട്രെയിലര്‍ ലോറിയും കൂട്ടിയിടിച്ചാണ് അപകടം. ടാങ്കര്‍ ലോറി കാലിയായിരുന്നതിനാല്‍ വന്‍ അപകടം ഒഴിവായി.