മണ്ണാര്‍ക്കാട്: പ്രമുഖ പണ്ഡിതനും സമസ്ത കേരള ജംഇയ്യത്തുല്‍ ഉലമയുടെ പ്രസിഡന്റുമായിരുന്ന കുമരംപുത്തൂര്‍ എ.പി. മുഹമ്മദ് മുസ്‌ലിയാറുടെ  പേരില്‍ സമസ്ത കോര്‍ഡിനേഷന്‍ കമ്മിറ്റി സംഘടിപ്പിക്കുന്ന അനുസ്മരണവും ദിക്‌റ് ദുആ സമ്മേളനവും നാളെ രാവിലെ 09.30ന് കുന്തിപ്പുഴ കമ്യൂണിറ്റി ഹാളില്‍ നടക്കും. സമസ്ത കേരള ജംഇയ്യത്തുല്‍ മുഅല്ലിമീന്‍ സംസ്ഥാന പ്രസിഡന്റ് സി.കെ.എം സ്വാദിഖ് മുസ്‌ലിയാരുടെ അധ്യക്ഷതയില്‍ നടക്കുന്ന അനുസ്മരണ സമ്മേളനം പാണക്കാട് സയ്യിദ് അബ്ബാസലി ശിഹാബ് തങ്ങള്‍ ഉദ്ഘാടനം ചെയ്യും.
സമസ്ത കേരള ജംഇയ്യത്തുല്‍ ഉലമ സംസ്ഥാന ഉപാധ്യക്ഷന്‍ എം.ടി അബ്ദുല്ല മുസ്‌ലിയാര്‍ ദുആക്ക് നേതൃത്വം നല്‍കും. പട്ടിക്കാട് ജാമിഅഃ നൂരിയ്യഃ അറബിക് കോളജ് പ്രൊഫസര്‍ സുലൈമാന്‍ ഫൈസി ചുങ്കത്തറ അനുസ്മരണ പ്രഭാഷണം നിര്‍വഹിക്കും. സമസ്ത കേന്ദ്ര മുശാവറ അംഗങ്ങളായ ശൈഖുനാ നെല്ലായ കുഞ്ഞ് മുഹമ്മദ് മുസ്‌ലിയാര്‍, സയ്യിദ് കെ.പി.സി. തങ്ങള്‍ വല്ലപ്പുഴ, സുന്നി യുവജന സംഘം സംസ്ഥാന ഉപാധ്യക്ഷന്‍ സയ്യിദ് ഇമ്പിച്ചിക്കോയ തങ്ങള്‍ ലക്കിടി, ഇസ്വാഫ് ഹോസ്പിറ്റല്‍ മെഡിക്കല്‍ സൂപ്രണ്ട് ഡോ. റൈസണ്‍ ചാക്കോ, സമസ്തയുടെയും പോഷക ഘടകങ്ങളുടെയും സംസ്ഥാന ജില്ലാ നേതാക്കള്‍ സംബന്ധിക്കും.