കൊട്ടാരക്കര: സിറ്റി പൊലിസ് കമ്മീഷണര്‍ സതീശ് ബീനോ യുടെ നിര്‍ദേശാനുസരണം കഴിഞ്ഞ ദിവസം റൂറല്‍ പൊലിസ് നടത്തിയ മിന്നല്‍ പരിശോധനയില്‍ കൊട്ടാരക്കര സബ് ഡിവിഷനില്‍ 39 പേരെ അറസ്റ്റു ചെയ്തു. നിരവധിപേര്‍ക്കെതിരേ കേസുമെടുത്തിട്ടുണ്ട്. കൊട്ടാരക്കര ഡി.വൈ.എസ്സ്.പി ബി. കൃഷ്ണകുമാറിന്റെ നേതൃത്വത്തില്‍ നടത്തിയ പരിശോധനയില്‍ മദ്യപിച്ച് വാഹനം ഓടിച്ചതിനും, പൊതു സ്ഥലത്ത് മദ്യപിച്ചതിനും, മദ്യലഹരിയില്‍ പൊതുജനശല്യം ഉണ്ടാക്കിയവര്‍ക്കും, സ്ത്രീകളെ ശല്യം ചെയ്തവര്‍ക്കും, അനധികൃതപുകയില ഉല്‍പന്നങ്ങള്‍ വില്‍പന നടത്തിയവര്‍ക്കുമെതിരെയാണ് നടപടിയെടുത്തത്.
സബ് ഡിവിഷനില്‍ കുണ്ടറ പൊലിസ് സ്റ്റേഷനില്‍ 19, ഈസ്റ്റ് കല്ലട പൊലിസ് സ്റ്റേഷനില്‍ 13 , ശാസ്താംകോട്ട പൊലിസ് സ്റ്റേഷനില്‍ 16, ശൂരനാട് പൊലിസ് സ്റ്റേഷനില്‍ 10 , കൊട്ടാരക്കര പൊലിസ് സ്റ്റേഷനില്‍ 18 , പുത്തൂര്‍ പൊലിസ് സ്റ്റേഷനില്‍ 11, എഴുകോണ്‍ പൊലിസ് സ്റ്റേഷനില്‍ 16 , പൂയപ്പളളി പൊലിസ് സ്റ്റേഷനില്‍ 15 എന്നിങ്ങനെ കേസുകള്‍ രജിസ്റ്റര്‍ ചെയ്തു. കൂടാതെ എല്ലാ സ്റ്റേഷനുകളിലുംകൂടി നിയമലംഘനം നടത്തി വാഹനം ഓടിച്ചവര്‍ക്കെതിരെ 328 പെറ്റി കേസുകളും, സ്ത്രീകളെ ശല്യം ചെയ്ത പൂവാലന്‍മാര്‍ക്കെതിരെ 14 പെറ്റി കേസുകളും എടുത്തു. 38 വാറണ്ടു പ്രതികളേയും ദീര്‍ഘനാളായി ഒളിവില്‍ കഴിഞ്ഞുവന്ന കിഴക്കേകല്ലട സ്വദേശിയായ വാറണ്ട് പ്രതിയേയും അറസ്റ്റ് ചെയ്തതായും ഡി.വൈ.എസ്.പി അറിയിച്ചു. സി.ഐ മാരായ എ. പ്രസാദ്, ഷൈനുതോമസ്, ബിനുകുമാര്‍ എസ്.ഐ മാരായ രജീഷ്‌കുമാര്‍, ഷുക്കൂര്‍, രാജീവ്, ജോസഫ് ലിയോണ്‍, ശിവപ്രകാശ്, സുധീഷ്, അനില്‍കുമാര്‍, അബ്ദുള്‍ മനാഫ്, സാബുജി തുടങ്ങിയവര്‍ പരിശോധനക്ക് നേതൃത്വം നല്‍കി.