യൂറോപ്പില്‍ നിന്നും ശൂന്യതയുടെ മണല്‍ക്കാടിലേക്കു ജീവിതം പറിച്ചുനടുക, അവിടെ ഗ്രാമീണ അറബിയെപ്പോലെ ഒരു എംബസി ഉദ്യോഗസ്ഥന്‍ ജീവിക്കുക, യൂറോപ്പിന്റെ ശൈത്യവന്യതയില്‍ നിന്നു മരുഭൂ ജീവിതത്തിലേക്ക് ഇറങ്ങി വന്നിരിക്കുകയാണ് നെതര്‍ലന്‍ഡ് എംബസിയിലെ ഉദ്യോഗസ്ഥനായിരുന്ന പോള്‍ മാര്‍ഷല്‍ ക്യൂപെര്‍ ഷേഖ്.
 മരുഭൂമിയോടും അറേബ്യന്‍ ജനതയോടുമുള്ള അടങ്ങാത്ത ഇഷ്ടമാണ് പോള്‍ മാര്‍ഷല്‍ ക്യൂപെറെ ഇവിടെ എത്തിച്ചത്. സഊദി അറേബ്യയില്‍ നയതന്ത്ര ഉദ്യോഗസ്ഥനായി പോള്‍ എത്തിയപ്പോള്‍ മരുപ്പറമ്പുകളാണ് അദ്ദേഹത്തെ ആദ്യം ആകര്‍ഷിച്ചത്.
പിന്നെ, അദ്ദേഹം മരുപ്പറമ്പില്‍ ഒട്ടകക്കൂട്ടങ്ങളെ മേച്ചു നടന്നു. പ്രാകൃത ജീവിതം നയിക്കുന്ന നിഷ്‌കളങ്കരായ ബിദൂനികളുടെ ജീവിതത്തില്‍ ലയിച്ചു ചേര്‍ന്നു. അവരുടെ കുടുംബത്തിലെ അംഗമായാലോ എന്നുവരെ ആലോചിച്ചു. കുറഞ്ഞ കാലംകൊണ്ട് അറബി ഭാഷ സ്വായത്തമാക്കി. നാലു വര്‍ഷത്തിനകം ബദൂവിയന്‍ സംസാര ശൈലികളിലും നിപുണനായി. ബദൂവിയന്‍ ഭാഷ മാത്രമല്ല, അറബി നാടോടി സാഹിത്യവും പ്രാദേശിക വിജ്ഞാനങ്ങളും അനായാസം വഴങ്ങി. ഒടുവില്‍ ദൂതന്‍ എന്ന പേരും അദ്ദേഹത്തിനു പതിഞ്ഞു കിട്ടി.  
മൂന്നു പതിറ്റാണ്ടു മുന്‍പ് സഊദിയില്‍ എത്തിയപ്പോള്‍ തോന്നിയ ആവേശം ഇന്നും മണല്‍ക്കാടുകളോട് അദ്ദേഹം കെടാതെ സൂക്ഷിക്കുന്നു. റിയാദിലെ ഹോളണ്ട് എംബസിയില്‍ ജോലി ചെയ്യുന്ന കാലത്ത് അല്‍ നസീം ജില്ലയിലായിരുന്നു താമസം. അവിടെ നിന്നു നബാതിയന്‍ കവിതയും ബദുക്കളുടെ സംസാര ശൈലിയും പഠിച്ചെടുത്തു.
അതിനു ശേഷമാണ് മരുഭൂമിയുടെ ഹൃദയങ്ങള്‍ തേടിയുള്ള യാത്രകള്‍ ആരംഭിച്ചത്. അല്‍ അറബിയ ഡോക്യുമെന്ററിയില്‍ മരുഭൂ ജീവിതത്തെക്കുറിച്ച് അദ്ദേഹം വാചാലനാകുന്നു. 'മരുഭൂമി എന്റെ മാതൃഭൂമിയാണ്. ശൈത്യകാലത്ത് മഞ്ഞുപുതച്ച നെതര്‍ലന്‍ഡിലെ സായാഹ്നത്തില്‍ ഇരുട്ടു പരക്കുമ്പോള്‍ എന്റെ മനസ് ഓടുന്നത് മരുഭൂമികളിലേക്കാണ്. ഏറ്റവും വലിയ മരുഭൂമിയായ നുഫൂദിന്റെ ആഴങ്ങളില്‍ എന്റെ ചിന്തകള്‍ പറന്നു നടക്കും'.
അറബിയിലെ വാചാലത കേട്ടാല്‍ ഒന്നാന്തരം അറബ് വംശജനാണ് സംസാരിക്കുന്നതെന്നേ തോന്നൂ. അത്രയും സ്ഫുടതയോടെയാണ് സംസാരം. 'രാത്രിയില്‍ മരുഭൂമി വളരെ മനോഹരമാണ്. നക്ഷത്രങ്ങള്‍ യാതൊരു തടസവും ഇല്ലാതെ കാണുന്നത് അതി മനോഹരം തന്നെ'. അദ്ദേഹം പറയുന്നു.
ഒരു വേള,  പ്രേമനായകരുടെ രാജാവായ അറബ് സാഹിത്യത്തിലെ ഇമ്രുല്‍ ഖൈസിന്റെ കവിതകളിലേക്ക് അറിയാതെ അദ്ദേഹം ഇറങ്ങിച്ചെല്ലുന്നുണ്ട്. ഖൈസിന്റെ ഈരടികള്‍ ചൊല്ലി അദ്ദേഹം അനുവാചകരെ അത്ഭുതപ്പെടുത്തുന്നു. എല്ലാത്തിനും ഒരര്‍ഥമുണ്ടെന്ന അറബ് കാവ്യപ്രയോഗത്തെ തിരിച്ചറിയാന്‍ ഈ പര്യടനങ്ങള്‍ തന്നെ പ്രാപ്തനാക്കിയെന്നും പോള്‍ മാര്‍ഷല്‍ പറയുന്നു. പാരമ്പര്യ സഊദി സമൂഹത്തെയും പ്രാദേശിക കാവ്യരീതികളെയും കുറിച്ച് വിശദമായി പ്രതിപാദിക്കുന്ന യാത്രാവിവരണമായ 'അറേബ്യ ഓഫ് ദി ബൈദൂയിന്‍സി'ന്റെ രചയിതാവാണ് അദ്ദേഹം.