തൃശൂര്‍: ബസ് ചാര്‍ജ് വര്‍ധിപ്പിക്കണമെന്ന ആവശ്യവുമായി ഓള്‍ കേരള ബസ് ഓപറേറ്റേഴ്‌സ് കോഡിനേഷന്‍ കമ്മിറ്റി രംഗത്ത്. പെട്രോളിനും ഡീസലിനും വീണ്ടും വില വര്‍ധിപ്പിച്ച സാഹചര്യത്തില്‍ ചാര്‍ജ് വര്‍ധിപ്പിക്കാതെ മുന്നോട്ടുപോകാനാകില്ലെന്നു ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
മിനിമം ചാര്‍ജ് ഒന്‍പതുരൂപയാക്കുക, കിലോമീറ്റര്‍ നിരക്ക് 70 പൈസയാക്കുക, വിദ്യാര്‍ഥികളുടെ മിനിമം ചാര്‍ജ് അഞ്ചുരൂപയാക്കുക തുടങ്ങിയ ആവശ്യങ്ങളുന്നയിച്ചു നാളെ ഗതാഗതമന്ത്രിയുമായി നേതാക്കള്‍ കൂടിക്കാഴ്ച നടത്തും. നിലവിലുള്ള നിരക്കുമായി മുന്നോട്ടുപോകാനാകില്ലെന്നു സര്‍ക്കാരിനെ അറിയിക്കും. മൂന്നു വര്‍ഷമായി സംസ്ഥാനത്ത് ബസ് ചാര്‍ജില്‍ വര്‍ധനവുണ്ടായിട്ടില്ലെന്നും ഈ കാലയളവില്‍ ഡീസല്‍ വില ആറുരൂപയിലധികം വര്‍ധിച്ചുവെന്നും ബസുടമകള്‍ പറഞ്ഞു.
ജീവനക്കാരുടെ ശമ്പളം, ഇന്‍ഷുറന്‍സ്, സ്‌പെയര്‍ പാര്‍ട്‌സ് എന്നിവയിലുണ്ടായ വിലവര്‍ധനവും ബസുടമകള്‍ക്കു താങ്ങാനാവുന്നതിനുമപ്പുറത്താണ്. നോട്ടു പ്രതിസന്ധി ഏറ്റവുമധികം ബാധിച്ചതു സ്വകാര്യ ബസുടമകളെയാണ്. 40 ശതമാനം യാത്രക്കാരുടെ കുറവാണു രണ്ട് ആഴ്ച കൊണ്ട് ഉണ്ടായത്.
നോട്ട് പ്രതിസന്ധിക്കുശേഷം ബസില്‍ യാത്രചെയ്യുന്നതു വിദ്യാര്‍ഥികള്‍ മാത്രമാണെന്നും വിദ്യാര്‍ഥികളുടെ യാത്രാക്കൂലി വര്‍ധിപ്പിക്കേണ്ടത് അത്യവശ്യമാണെന്നും ബസ് ഓപറേറ്റേഴ്‌സ് കോഡിനേഷന്‍ കമ്മിറ്റി ഭാരവാഹികള്‍ വ്യക്തമാക്കി.