ചെറുവത്തൂര്‍: ഞാണങ്കൈ ദേശീയപാതയില്‍ പാഴ്‌സല്‍ ലോറി മറിഞ്ഞു. വന്‍ ദുരന്തം ഒഴിവായി. സംഭവത്തെ തുടര്‍ന്ന് ദേശീയപാതയില്‍ ഒരുമണിക്കൂറോളം ഗതാഗതം തടസപ്പെട്ടു.
ഇന്നലെ പുലര്‍ച്ചെ അഞ്ചോടെയാണ് ഞാണങ്കൈ വളവില്‍ അപകടം നടന്നത്. മംഗളൂരുവില്‍ നിന്നും കൊച്ചിയിലേക്ക് പെയിന്റുമായി പോവുകയായിരുന്ന ലോറിയാണ് അപകടത്തില്‍പ്പെട്ടത്. ഡ്രൈവറും ക്ലീനറും പരുക്കുകളില്ലാതെ രക്ഷപ്പെട്ടു.
രാവിലെ പത്തോടെ ലോറി ക്രെയിനിന്റെ സഹായത്തോടെ നീക്കം ചെയ്തു. ഒരു മാസം മുമ്പ് ഇതേ വളവില്‍ ടാങ്കര്‍ ലോറി മറിഞ്ഞിരുന്നു. വാതക ചോര്‍ച്ചയില്ലാത്തതിനാല്‍ വന്‍ അപകടം ഒഴിവായിരുന്നു. ഈ വളവില്‍
അപകടങ്ങള്‍ തുടര്‍ക്കഥയാണ്. അപകടങ്ങള്‍ നിരവധി തവണ ഉണ്ടായിട്ടും ഡിവൈഡര്‍ സ്ഥാപിക്കാന്‍ അധികൃതര്‍ തയാറായിട്ടില്ല. ചീമേനിയില്‍ നിന്ന് ചെറുവത്തൂരിലേക്കുള്ള റോഡ് ഈ വളവിലാണ് സന്ധിക്കുന്നത്. മുന്നില്‍ നിന്നും പിന്നില്‍ നിന്നും വരുന്ന വാഹനങ്ങള്‍ പെട്ടെന്ന് ശ്രദ്ധയില്‍പ്പെടാത്തത് നിരവധി അപകടങ്ങള്‍ക്ക് കാരണമായിരുന്നു.