വേങ്ങര: ജില്ലാ കേരളോത്സവത്തിനു തയാറായി വേങ്ങര. 21 മുതല്‍ 28 വരെ നടക്കുന്ന കലാ കായിക പരിപാടികളുടെ എന്‍ട്രികള്‍ സ്വീകരിക്കേണ്ട സമയപരിധി ഇന്നലെ വൈകിട്ട് മൂന്നോടെ അവസാനിച്ചു. വേങ്ങര ബ്ലോക്കിലെ വിവിധ ഭാഗങ്ങളിലായാണ് മത്സരങ്ങള്‍ നടക്കുക. മത്സരങ്ങള്‍ എല്ലാ ദിവസവും രാവിലെ ഒന്‍പതിനു തുടങ്ങും. കായിക മത്സരങ്ങളാണ് ആദ്യം നടക്കുന്നത്. 21, 22 തിയതികളില്‍ പറപ്പൂര്‍ മിനി സ്റ്റേഡിയത്തില്‍ ക്രിക്കറ്റ്, 21 ന് വേങ്ങര ബ്ലോക്ക് പഞ്ചായത്ത് ഹാളില്‍ ചെസ്സ്, 22, 23 നു കോഴിച്ചെന എം.എസ്.പി ഗ്രൗണ്ടില്‍ ഫുട്‌ബോള്‍, 22 ന്് വേങ്ങര റാക്കറ്റ് ഹാര്‍ട്ട് ഇന്‍ഡോര്‍ സ്റ്റേഡിയത്തില്‍ ഷട്ടില്‍ മത്സരം, 23ന് പറപ്പൂര്‍ മിനി സ്റ്റേഡിയത്തില്‍ വടംവലി, കബഡി, 23ന് ഊരകം ഒ.കെ മുറി ജി.എം.എല്‍.പി സ്‌കൂള്‍ ഗ്രൗണ്ടില്‍ ആര്‍ച്ചറി, കളരിപ്പയറ്റ്, പഞ്ചഗുസ്തി, 23ന് ഒതുക്കുങ്ങല്‍ ഗവ.ഹയര്‍ സെക്കന്‍ഡറി സ്‌കൂള്‍ ഗ്രൗണ്ടില്‍ ബാസ്‌കറ്റ്‌ബോള്‍, 23, 24ന് വലിയോറ ഈസ്റ്റ് എ.എം.യു.പി സ്‌കൂള്‍ ഗ്രൗണ്ടില്‍ വോളിബോള്‍, 24 ന് കോഴിച്ചെന എം.എസ്.പി ഗ്രൗണ്ടില്‍ അത്‌ലറ്റിക്‌സ് മത്സരങ്ങള്‍, നീന്തല്‍ 26ന് നിലമ്പൂര്‍ പി.വി സ്‌കൂള്‍ സ്വിമ്മിങ് പൂളില്‍ എന്നിവ നടക്കും. 26 ന് ഉച്ചക്ക്് രണ്ടിന് വേങ്ങര അമ്മാഞ്ചേരിക്കാവ് പരിസരത്തു നിന്നും ആരംഭിക്കുന്ന ഘോഷയാത്ര കുറ്റാളൂര്‍ ബോയ്‌സ് ഹയര്‍ സെക്കന്‍ഡറി സ്‌കൂള്‍ പരിസരത്ത്് സമാപിക്കും. വിവിധ പഞ്ചായത്തുകളുടെയും ക്ലബുകളുടേയും നിശ്ചല ദൃശ്യങ്ങള്‍, കലാരൂപങ്ങള്‍, വാദ്യ- മേളങ്ങളോടെയാണ് ഘോഷയാത്ര. തുടര്‍ന്ന് ഉദ്ഘാടന സമ്മേളനവും കലാ മത്സരങ്ങളും നടക്കുമെന്ന് സംഘാടക സമിതി അറിയിച്ചു.