ചെന്നൈ: അന്തരിച്ച മുന്‍ മുഖ്യമന്ത്രി ജയലളിതയ്ക്ക് ഭാരത രത്‌ന നല്‍കണമെന്നാവശ്യപ്പെട്ടുകൊണ്ടുള്ള തമിഴ്‌നാടിന്റെ കത്ത് മുഖ്യമന്ത്രി ഒ. പനീര്‍ശെല്‍വം പ്രധാനമന്ത്രി നരേന്ദ്ര മോദിക്ക് കൈമാറും.
വര്‍ധ ചുഴലിക്കൊടുങ്കാറ്റിനെതുടര്‍ന്ന് നാശനഷ്ടങ്ങള്‍ സംബന്ധിച്ച ചര്‍ച്ചക്കായിട്ടാണ് അദ്ദേഹം പ്രധാനമന്ത്രിയെ സന്ദര്‍ശിക്കുന്നത്. സന്ദര്‍ശനത്തില്‍ തമിഴ്‌നാടിന്റെ ആവശ്യമായി ജയലളിതയ്ക്ക് മരണാനന്തര ബഹുമതിയായി ഭാരത രത്‌ന നല്‍കണമെന്ന കത്ത് കൈമാറുമെന്ന് സര്‍ക്കാര്‍ വൃത്തങ്ങള്‍ അറിയിച്ചു.
ഇതുമായി ബന്ധപ്പെട്ട പ്രമേയം ക്യാബിനറ്റ് യോഗം ഏകകണ്ഠമായി അംഗീകരിച്ചു. പ്രമേയത്തില്‍ ഭാരത രത്‌നയുടെ പേര് മാറ്റണമെന്നും ആവശ്യപ്പെട്ടിട്ടുണ്ട്. എം.ജി.ആറിന് നല്‍കിയിരുന്ന ഭാരത രത്‌നയുടെ പേര് ഭാരത രത്‌ന ഡോ. പുരട്ചിതലൈവര്‍ എം.ജി.ആര്‍ എന്നും ജയലളിതക്ക് ഭാരത രത്‌ന നല്‍കുമ്പോള്‍ അത് പുരൈട്ചി തലൈവി അമ്മ സെല്‍വി ജെ. ജയലളിത എന്നും മാറ്റണമെന്നുമാണ് പ്രമേയത്തില്‍ ആവശ്യപ്പെട്ടിട്ടുള്ളത്.