ചണ്ഡിഗഡ്: പത്താന്‍കോട്ട് ഭീകരാക്രമണത്തെക്കുറിച്ച് അന്വേഷണം നടത്തിയ ദേശീയ സുരക്ഷാ ഏജന്‍സി(എന്‍.ഐ.എ)കുറ്റപത്രം ഇന്ന് ചണ്ഡിഗഡ് കോടതിയില്‍ സമര്‍പ്പിക്കും.
കുറ്റപത്രത്തില്‍ പാക് കേന്ദ്രീകരിച്ച് പ്രവര്‍ത്തിക്കുന്ന ജെയ്‌ഷെ മുഹമ്മദിന്റെ നേതാവ് മൗലാന മസൂദ് അസര്‍, ഇയാളുടെ സഹോദരന്‍ റഊഫ് അസര്‍, ഖാഷിഫ് ജാന്‍, ഷെയ്ദ് ലത്തിഫ് എന്നിവരാണ് ആക്രമണത്തിന്റെ സൂത്രധാരന്മാര്‍ എന്ന് വ്യക്താക്കിയിട്ടുണ്ട്. മൗലാന മസൂദ് അസറാണ് ആക്രമണത്തിന്റെ മുഖ്യസൂത്രധാരന്‍. 2016 ജനുവരി ആദ്യ ആഴ്ചയിലാണ് ഭീകരര്‍ പത്താന്‍ കോട്ട് വ്യോമസേനാ താവളത്തില്‍ ആക്രമണം നടത്താന്‍ പദ്ധതിയിട്ടത്. വ്യോമസേനാംഗങ്ങളെ കൊലപ്പെടുത്തുകയും താവളം പൂര്‍ണമായി നശിപ്പിക്കുകയെന്നതുമായിരുന്നു ലക്ഷ്യമെന്നും കുറ്റപത്രത്തില്‍ പറയുന്നു.
അതേസമയം ഭീകരാക്രമണത്തിന്റെ പശ്ചാത്തലത്തില്‍ സംശയമുന നീണ്ടിരുന്ന പഞ്ചാബ് പൊലിസ് സുപ്രണ്ട് സല്‍വിന്ദര്‍ സിങിന് എന്‍.ഐ.എ ക്ലീന്‍ ചിറ്റ് നല്‍കിയിട്ടുണ്ട്.
വ്യോമതാവളം ആക്രമിച്ച സംഘത്തിലെ നാല് ഭീകരരില്‍ നിന്ന് പിടിച്ചെടുത്ത മൊബൈല്‍ ഫോണുകളില്‍ നിന്നാണ് ആക്രമണം നടത്തിയവരെക്കുറിച്ചും ഇവരുടെ ബന്ധുക്കളെക്കുറിച്ചും ഭീകരരുടെ വിലാസത്തെക്കുറിച്ചുമെല്ലാമുള്ള വിവരങ്ങള്‍ അന്വേഷണ സംഘത്തിന് ലഭിച്ചത്.
ഭീകരര്‍ തങ്ങളുടെ ബന്ധുക്കളുമായി സംസാരിച്ചതിന്റെ തെളിവുകളും ലഭിച്ചിരുന്നു. ഇവരുടെ ശബ്ദ സാമ്പിളുകളും കുറ്റപത്രത്തിനൊപ്പം കോടതിയില്‍ സമര്‍പ്പിക്കും.