വടക്കാഞ്ചേരി: അകമലയില്‍ ഭക്ഷണംതേടി നാട്ടിലിറങ്ങിയ പുള്ളിമാനെ തെരുവ് നായ്ക്കള്‍ കടിച്ചുകൊന്നു. നാടും,കാടും കടുത്ത വരള്‍ച്ചയുടെ പിടിയിലാകുമ്പോള്‍ വന്യമൃഗങ്ങള്‍ക്ക് ഭക്ഷണവും, വെള്ളവുമില്ല. ദാഹജലത്തിനും ഭക്ഷണത്തിനും വേണ്ടി മൃഗങ്ങള്‍ കൂട്ടത്തോടെ നാട്ടിലിറങ്ങുമ്പോള്‍ ഇവയില്‍ ഭൂരിഭാഗവും പല വിധത്തില്‍ വേട്ടയാടപ്പെടുകയാണ്.
മാനുകള്‍ വലിയ തോതില്‍ തെരുവ് നായ്ക്കളുടെ ആക്രമണത്തിന് ഇരയാവുകയാണ്. അകമല വനമേഖലയില്‍ കഴിഞ്ഞ ഏതാനും ദിവസങ്ങളായി ട്രെയിന്‍ തട്ടി ചത്ത വന്യമൃഗങ്ങള്‍ നിരവധിയാണ് ഇതില്‍ ഭീമന്‍ മ്ലാവുകള്‍ മുതല്‍ പന്നികളും, മാനുകളുമൊക്കെ ഉള്‍പ്പെടുന്നു. പന്നികള്‍ കിണറുകളിലും വലിയ കുഴികളിലുമൊക്കെ വീണാണ് ചാകുന്നത്.