തളിപ്പറമ്പ് : കണ്ണൂര്‍ സര്‍വകലാശാല അത്‌ലറ്റിക് മീറ്റില്‍ പുരുഷ വിഭാഗത്തില്‍ മുന്നാട് പീപ്പിള്‍സ് കോളജും, വനിതാ വിഭാഗത്തില്‍ സ്‌കൂള്‍ ഓഫ് ഫിസിക്കല്‍ എഡ്യുക്കേഷനും ചാംപ്യന്മാരായി. മാങ്ങാട്ടുപറമ്പ് സ്‌പോര്‍ട്‌സ് കോംപ്ലക്‌സില്‍ രണ്ടു ദിവസമായി നടന്നുവരുന്ന മീറ്റില്‍ പുരുഷ വിഭാഗത്തില്‍ 56 പോയിന്റുനേടിയാണ് മുന്നാട് പീപ്പിള്‍സ് കോളജ് ചാംപ്യന്മാരായത്. 54 പോയിന്റ് നേടി സ്‌കൂള്‍ ഓഫ് ഫിസിക്കല്‍ എഡ്യുക്കേഷന്‍ രണ്ടാം സ്ഥാനവും, 37 പോയിന്റ് നേടി കാസര്‍ഗോഡ് ഗവ.കോളജ് മൂന്നാം സ്ഥാനവും കരസ്ഥമാക്കി. വനിതാ വിഭാഗത്തില്‍ 101 പോയിന്റ് നേടി സ്‌കൂള്‍ ഓഫ് ഫിസിക്കല്‍ എഡ്യുക്കേഷന്‍ ചാംപ്യന്‍ഷിപ്പ് നിലനിര്‍ത്തി. 23 പോയിന്റ് നേടി പീപ്പിള്‍സ് കോളജ് മുന്നാട് രണ്ടാം സ്ഥാനവും, 21 പോയിന്റ് നേടി കേയി സാഹിബ് ട്രെയിനിങ് കോളജ് തളിപ്പറമ്പ് മൂന്നാം സ്ഥാനവും കരസ്ഥമാക്കി. കാസര്‍കോഡ് ഗവണ്‍മെന്റ് കോളജിലെ അക്ഷയ്കുമാറും, മാനന്തവാടി ഗവണ്‍മെന്റ് എന്‍ജിനിയറിങ് കോളജിലെ നീനു തോമസുമാണ് മീറ്റിലെ മികച്ച അത്‌ലറ്റുകള്‍. മീറ്റിന്റെ സമാപന ചടങ്ങില്‍ സര്‍വകലാശാലാ വൈസ് ചാന്‍സിലര്‍ ഡോ.എം.കെ അബ്ദുല്‍ഖാദര്‍ വിജയികള്‍ക്കുളള ട്രോഫികള്‍ വിതരണം ചെയ്തു. യൂണിവേഴ്‌സിറ്റി കായിക വിഭാഗം ഡയറക്ടര്‍ ഡോ.പി.ടി ജോസഫ്, സിന്‍ഡിക്കേറ്റ് അംഗങ്ങളായ ഡോ.വി.എ വില്‍സണ്‍, ഡോ.കെ അജയകുമാര്‍, എം.വി ശ്രീരാജു എന്നിവര്‍ പങ്കെടുത്തു. സ്‌കൂള്‍ ഓഫ് ഫിസിക്കല്‍ എഡ്യുക്കേഷന്‍ അസി.പ്രൊഫസര്‍ ജി ദീപക് നന്ദി പറഞ്ഞു.