ഉരുവച്ചാല്‍: ക്രിസ്മസ്-പുതുവത്സരാഘോഷത്തിനു ദിവസങ്ങള്‍ മാത്രം ശേഷിക്കെ വിപണിയില്‍ നക്ഷത്ര തിളക്കം. നോട്ടു പ്രതിസന്ധിയുണ്ടെങ്കിലും നക്ഷത്ര വില്‍പനയില്‍ ഇടിവൊന്നും ഉണ്ടായിട്ടില്ലെന്നു വ്യാപാരികള്‍ പറയുന്നു. 50 മുതല്‍ 250 രൂപ വരെയുള്ള നക്ഷത്രങ്ങളും 200 രൂപ മുതല്‍ 500 രൂപ വരെ വിലയുള്ള എല്‍.ഇ.ഡി നക്ഷത്രങ്ങളും വലിയ തോതില്‍ വിറ്റഴിയുന്നുണ്ടെന്നും വ്യാപാരികള്‍ പറയുന്നു.
വിവിധ വര്‍ണത്തിലുള്ള കടലാസുകള്‍ വെട്ടി ഒതുക്കി പ്രത്യേക ഭംഗിയോടെ വിപണിയിലിറക്കിയ 'പുലിമുരുകന്‍' നക്ഷത്രങ്ങളാണു ഇത്തവണ വിപണിയിലെ പ്രധാന ആകര്‍ഷണം. പുറത്തുനിന്നെത്തുന്ന എല്‍.ഇ.ഡി നക്ഷത്രങ്ങളെക്കാള്‍ സ്വദേശ ഉല്‍പന്നങ്ങള്‍ക്കാണു പ്രിയമേറെയെന്നു വ്യാപാരികള്‍ പറയുന്നു.
വിവിധതരത്തിലുള്ള നക്ഷത്രങ്ങള്‍ക്കു ഡിമാന്റ് കൂടുതലുണ്ടെങ്കിലും പ്ലാസ്റ്റിക് ഉല്‍പന്നങ്ങള്‍ക്ക് ആവശ്യക്കാരേയില്ലെന്നതാണ് ഈ സീസണിലെ പ്രത്യേകത.
വലുപ്പമേറെയുള്ള നക്ഷത്രങ്ങള്‍ക്കൊപ്പം മാല ബള്‍ബുകള്‍, മണ്ണു കൊണ്ടുള്ള ഉണ്ണിയേശു, പുല്‍ക്കൂട് വിവിധതരം പാവകള്‍ എന്നിവയ്ക്കും ആവശ്യക്കാരെറെയാണ്.
പാപ്പമാരുടെ വസ്ത്രം, തൊപ്പികള്‍ മുഖം മൂടി എന്നിവയ്ക്കും വിപണിയില്‍ ഡിമാന്റുണ്ട്.