തൃക്കരിപ്പൂര്‍: ആയിറ്റി ജമാഅത്തിന്റെ കീഴില്‍ അഞ്ച് പതിറ്റാണ്ടിലേറെയായി പാവപ്പെട്ടവര്‍ക്ക് തണലായി റിലീഫ് പ്രവര്‍ത്തനങ്ങളും മറ്റ് ജീവകാരുണ്യ പ്രവര്‍ത്തനങ്ങളും നടത്തിവരുന്ന നുസ്‌റത്തുല്‍ ഇസ്‌ലാം സംഘത്തിന്റെ ഗോള്‍ഡന്‍ ജൂബിലി ആഘോഷവും,മത പ്രഭാഷണ പരമ്പരയും,സാംസ്‌കാരിക സമ്മേളനവും ഡിസംബര്‍ 23 മുതല്‍ 2017 ജനുവരി 1 വരെ ആയിറ്റി ജുമാ മസ്ജിദ് അങ്കണത്തില്‍ വെച്ച് നടക്കും. പരിപാടിയുടെ ഭാഗമായി 29ന് തൃക്കരിപ്പൂര്‍ റെയ്ഞ്ചിന് കീഴിലുള്ള മദ്‌റസ വിദ്യാര്‍ഥികളുടെ ദഫ്മുട്ട് മത്സരം സംഘടിപ്പിക്കും. 2017 ജനുവരി 1 ന് വൈകിട്ട് നടക്കുന്ന സാംസ്‌കാരിക സമ്മേളനം സംസ്ഥാന റവന്യൂ ഭവന വകുപ്പ് മന്ത്രി ഇ. ചന്ദ്രശേഖരന്‍ ഉദ്ഘാടനം ചെയ്യും. എം.ല്‍.എ. മാരായ എന്‍.എ നെല്ലിക്കുന്ന്,എം. രാജഗോപാലന്‍ എന്നിവര്‍ മുഖ്യാതിഥികളായി പങ്കെടുക്കും. രാത്രി നടക്കുന്ന സമാപന സമ്മേളനം പാണക്കാട് സയ്യിദ് റഷീദലി ശിഹാബ് തങ്ങള്‍ ഉദ്ഘാടനം ചെയ്യും.ഉസ്താദ് നവാസ് മന്നാനി പനവൂര്‍ മുഖ്യ പ്രഭാഷണം നടത്തും. തുടര്‍ന്ന് നടക്കുന്ന കൂട്ടു പ്രാര്‍ത്ഥനക്ക് എം.എസ് തങ്ങള്‍ മദനി ഓലമുണ്ട നേതൃത്വം നല്‍കും. പത്ത് ദിവസങ്ങളിലായി നടക്കുന്ന പരിപാടിയില്‍ പ്രഭാഷണം, ദഫ്മുട്ട് മല്‍സരം, കഥാ പ്രസംഗം, ബുര്‍ദ മജ്‌ലിസ് തുടങ്ങിയ നിരവധി പരിപാടികള്‍ നടക്കും. വിവിധ ദിവസങ്ങളിലായി നിരവധി പണ്ഡിതന്മാരും, സാദത്തുക്കളും, ഉലമാക്കളും പങ്കെടുക്കും.