ഫറോക്ക്: അര്‍ധരാത്രിയില്‍ ദേശീയപാതക്കരികില്‍ കക്കൂസ്മാലിന്യം തള്ളാനെത്തിയ ടാങ്കര്‍ലോറി പിടികൂടി. കോര്‍പറേഷന്‍ നല്ലളം മേഖലാ കേന്ദ്രത്തിലെ ജൂനിയര്‍ ഹെല്‍ത്ത് ഇന്‍സ്‌പെക്ടറും നല്ലളം പൊലിസും ചേര്‍ന്നു കഴിഞ്ഞ ദിവസം 12.45ഓടെയാണു വ്യാപാരസ്ഥാപനങ്ങളില്‍നിന്നും മറ്റുമുള്ള കക്കൂസ് മാലിന്യമുള്‍പ്പെടെയുള്ളവയുമായി എത്തിയ ടാങ്കര്‍ ലോറി പിടികൂടിയത്. ദേശീപാതക്കരികില്‍ മോഡേണ്‍ പി.കെ സ്റ്റീലിനു സമീപമാണു സംഭവം.
കെ.എല്‍ 7 ബി.എല്‍ 5729 നമ്പര്‍ ടാങ്കര്‍ ലോറിയാണു പിടികൂടിയത്. വെള്ളയില്‍നിന്നുള്ള ഒരുസംഘം മാലിന്യം കരാറെടുത്തു കൊണ്ടുവരികയായിരുന്നു. ഫറോക്ക് ഭാഗത്തുനിന്നുള്ള മാലിന്യമാണ് ഇതെന്ന് ഇവര്‍ അധികൃതരോടു പറഞ്ഞു. വാഹനം പൊലിസ് കസ്റ്റഡിയിലെടുത്ത് വാഹന ഉടമക്കും ഡ്രൈവര്‍ക്കുമെതിരേ കേസെടുത്തു. കോര്‍പറേഷന്‍ അധികൃതര്‍ 25,000 രൂപ പിഴ അടപ്പിച്ച ശേഷം വാഹനം വിട്ടുനല്‍കി.