പേരാമ്പ്ര: കഴിഞ്ഞദിവസം അന്തരിച്ച പ്രമുഖ നാടകപ്രവര്‍ത്തകന്‍ വിജയന്‍ വാല്യക്കോടിന് അന്ത്യാഞ്ജലി. ശനിയാഴ്ച രാത്രി 7 മണിയോടെ വാല്യക്കോട് വച്ച് ഓട്ടോയിടിച്ചതിനെ തുടര്‍ന്ന് മെഡിക്കല്‍ കോളജിലേക്ക് കൊണ്ടുപോകും വഴിയാണ് മരിച്ചത്. ഒരു പതിറ്റാണ്ടിലേറെക്കാലം അമേച്വര്‍ പ്രൊഫഷണല്‍ നാടകവേദികളില്‍ സജീവ സാന്നിധ്യമായിരുന്നു വിജയന്‍. സംസ്ഥാന എക്‌സൈസ് വകുപ്പിന്റെ ആഭിമുഖ്യത്തില്‍ അവതരിപ്പിച്ചുവരുന്ന 'വരല്ലേ ഈ വഴി ഇനിയും വരല്ലേ ' എന്ന ലഹരി വിരുദ്ധ ബോധവല്‍കരണ നാടകത്തില്‍ പ്രധാനം വേഷം ചെയ്തു കൊണ്ട് ആയിരത്തിലേറെ വേദികളില്‍ വിജയന്‍ അഭിനയിച്ചു. മലബാറിലെ നിറഞ്ഞ വേദികളില്‍ നാടകം അവതരിപ്പിക്കപ്പെട്ടപ്പോള്‍ പ്രശംസനീയമായ പ്രകടനമാണ് വിജയന്‍ കാഴ്ചവച്ചത്. വളരെ ഗൗരവവും അതേ സമയം ഹാസ്യരസ പ്രധാനങ്ങളുമായ കഥാപാത്രങ്ങള്‍ തനിക്ക് ഒരു പോലെ ഇണങ്ങുമെന്ന് വിജയന്‍ അരങ്ങുകളില്‍ തെളിയിച്ചിരുന്നു.
കോഴിക്കോട് കലാഭവന്‍, സരിഗ പേരാമ്പ്ര, സി.എം വൈസി കല്‍പത്തൂര്‍, തുടങ്ങിയ സമിതികളിലും ഒട്ടേറെ അമേച്വര്‍ തെരുവ് നാടക സംഘങ്ങള്‍ക്ക് വേണ്ടിയും വിജയന്‍ പ്രവര്‍ത്തിച്ചു. മെഡിക്കല്‍ കോളജ് ആശുപത്രിയില്‍ നിന്ന് ഇന്നലെ വാല്യക്കോട് എത്തിച്ച ഭൗതിക ശരീരത്തില്‍ നിരവധി പേര്‍ അന്ത്യോപചാരമര്‍പ്പിച്ചു. പഞ്ചായത്ത് പ്രസിഡന്റ് പി.എം
കുഞ്ഞിക്കണ്ണന്‍, ബ്ലോക്ക് പഞ്ചായത്ത് മെമ്പര്‍ വി.കെ സുനീഷ്, മുന്‍ പഞ്ചായത്ത് പ്രസിഡന്റ് കെ.ടി ബാലകൃഷ്ണന്‍ മാസ്റ്റര്‍, എക്‌സൈസ് അസി. കമ്മീഷണര്‍ പി.കെ സുരേഷ്, കെ. ടി.ബി കല്‍പത്തൂര്‍, മറ്റു ജനപ്രതിനിധികള്‍, സാമൂഹ്യ സാംസ്‌കാരിക രാഷ്ട്രീയ പ്രവര്‍ത്തകര്‍ നാട്ടുകാര്‍ എന്നിവരുടെ സാന്നിധ്യത്തില്‍ ഉച്ചക്ക് ഒന്നരയോടെ വീട്ടുവളപ്പില്‍ സംസ്‌കരിച്ചു.