ഈരാറ്റുപേട്ട: കനത്ത മഴയും വെയിലും മാറി മാറി വരുന്ന കാലാവസ്ഥയില്‍ ഈരാറ്റുപേട്ടയുടെ കിഴക്കന്‍ പ്രദേശങ്ങള്‍ പകര്‍ച്ചാവ്യാധി ഭീഷണിയിലാണ്.
മുന്‍ വര്‍ഷങ്ങളിലെല്ലാം മഴക്കാലം ആരംഭിക്കുമ്പോള്‍ പകര്‍ച്ചപ്പനി, ഡങ്കിപ്പനി, എലിപ്പനി തുടങ്ങിയ പകര്‍ച്ചാ വ്യാധികള്‍ മേഖലയില്‍ പടര്‍ന്ന് പിടിച്ചിരുന്നു. തോട്ടം മേഖലയിലായിരുന്നു പകര്‍ച്ചാ വ്യാധികള്‍ ആരംഭിച്ചത്. കൈത കൃഷി, റബ്ബര്‍ ടാപ്പിംഗ്, തേയില മേഖലയില്‍ പണിയെടുക്കുന്ന തൊഴിലാളികളാണ് പകര്‍ച്ചാവ്യാധിക്ക് കൂടുതല്‍ ഇരയാകുന്നത്. മഴക്കാലപൂര്‍വ്വ ശുചീകരണ പ്രവര്‍ത്തനങ്ങളും രോഗം പടര്‍ത്തുന്ന കൊതുക് നശീകരണവും മുന്‍കൂര്‍ പ്രവര്‍ത്തനങ്ങള്‍ നടത്താന്‍ ആരോഗ്യ വകുപ്പ് ഇതുവരെയും തയ്യാറായിട്ടില്ല.
സമീപ പ്രദേശങ്ങളായ കോരുത്തോട്, എരുമേലി മുണ്ടക്കയം പഞ്ചായത്തുകളില്‍ പകര്‍ച്ചപ്പനിയും ഡങ്കിപ്പനി റിപ്പോര്‍ട്ട് ചെയ്തിട്ടും ഈരാറ്റുപേട്ട മേഖലയിലെ ആരോഗ്യ വകുപ്പ് അധികൃതര്‍ നടപടികള്‍ സ്വീകരിക്കാത്തത് പ്രതിഷേധത്തിന് ഇടയാക്കിയിട്ടുണ്ട്.