തൊടുപുഴ: നോട്ട് അസാധുവാക്കലുമായി ബന്ധപ്പെട്ടുണ്ടായ പ്രതിസന്ധി അടിയന്തരമായി പരിഹരിക്കണമെന്നും സഹകരണമേഖലയെ തകര്‍ക്കാനുള്ള നീക്കത്തില്‍നിന്ന് കേന്ദ്രസര്‍ക്കാര്‍ പിന്‍തിരിയണമെന്നും തൊടുപുഴയില്‍ ചേര്‍ന്ന ഗസറ്റഡ് ഓഫീസേഴ്‌സ് അസോസിയേഷന്‍ ജില്ലാ കൗണ്‍സില്‍ യോഗം ആവശ്യപ്പെട്ടു. അത്യാവശ്യത്തിനുപോലും പണമില്ലാതെ സാധാരണക്കാരും തൊഴിലാളികളും ജീവനക്കാരും ക്ലേശിക്കുകയാണ്. വിവാഹം, വസ്തുകൈമാറ്റം, അടിയന്തര ശസ്ത്രക്രിയകള്‍ തുടങ്ങിയവയ്ക്ക് പണമില്ലാതെ ജനങ്ങള്‍ വലയുമ്പോള്‍ ബാങ്കില്‍നിന്ന് പിന്‍വലിക്കാവുന്ന തുകയില്‍ കുറവ് വരുത്തി കേന്ദ്രസര്‍ക്കാര്‍ ജനങ്ങളുടെ ക്ഷമ വീണ്ടും പരീക്ഷിക്കുകയാണ്.
ഈ അവസരം രാഷ്ട്രീയ പകപോക്കലിനുള്ള അവസരമാക്കി കേരളത്തിലെ പൊതുജനങ്ങളുടെ സാമ്പത്തികാവശ്യങ്ങളുടെ അത്താണിയായ പതിനയ്യായിരത്തിലധികം വരുന്ന സഹകരണസ്ഥാപനങ്ങളെ തകര്‍ക്കാനുള്ള ബോധപൂര്‍വമായ നീക്കമാണ് കേന്ദ്രസര്‍ക്കാര്‍ നടത്തുന്നത്. അസോസിയേഷന്‍ സംസ്ഥാന സെക്രട്ടറിയറ്റംഗം പി.എസ് ശിവപ്രസാദ് യോഗം ഉദ്ഘാടനം ചെയ്തു. ജില്ലാ പ്രസിഡന്റ് എസ് രാജീവ് അധ്യഷനായി. സെക്രട്ടറി ഡേ. വി ബി വിനയന്‍ റിപ്പോര്‍ട്ട് അവതരിപ്പിച്ചു. ജയന്‍ പി വിജയന്‍, ഡോ. സികെ ഷൈലജ, കെ .ബി പ്യാരിലാല്‍, രഞ്ജു മാണി, എ .പി ഫ്രാന്‍സിസ്, ഡോ. ക്രിസ്റ്റി തുണ്ടിപ്പറമ്പില്‍, എസ് രാജേന്ദ്രകുമാര്‍, കെ .എം പാത്തുമ്മ, പി .വി മധു എന്നിവര്‍ സംസാരിച്ചു.