കോട്ടയം: തലയോലപറമ്പ് കൊലപാതക കേസില്‍ നിര്‍ണായക വിവരങ്ങള്‍ ലഭിച്ചെന്ന് പൊലിസ്. മൃതദേഹം കുഴിച്ചുമൂടിയെന്ന് യുവാവ് നല്‍കിയ മൊഴിയുടെ അടിസ്ഥാനത്തില്‍ നടത്തിയ തെരച്ചിലില്‍ അസ്ഥികഷ്ണങ്ങളും മരിച്ച മാത്യുവിന്റെ വാച്ചും കണ്ടെടുത്തു.

തലയോപ്പറമ്പില്‍ സ്വകാര്യ പണമിടപാടുകാരന്‍ മാത്യുവിനെ എട്ട് വര്‍ഷം മുന്‍പ് കൊലപ്പെടുത്തി കുഴിച്ചുമൂടിയ കേസിലാണ് അന്വേഷണം തുടരുന്നത്. പ്രതി അനീഷ് മൃതദേഹം കുഴിച്ചിട്ടതായി മൊഴിനല്‍കിയ കെട്ടിടത്തിന് അടുത്തുള്ള പറമ്പില്‍ നിന്ന് എല്ലിന്റെ കഷണങ്ങള്‍ പൊലിസിന് നേരത്തെ ലഭിച്ചിരുന്നു. എന്നാല്‍ ഇത് മനുഷ്യന്റേതല്ലെന്ന് പിന്നീട് ഫോറന്‍സിക് പരിശോധനയില്‍ വ്യക്തമായി.

പണമിടപാടിന്റെ പേരിലുണ്ടായ പ്രശ്‌നങ്ങളെതുടര്‍ന്നാണ് പ്രതി അനീഷ് തലയോലപ്പറമ്പ് സ്വദേശിയായ മാത്യുവിനെ കഴുത്തുഞെരിച്ച് കൊന്ന് കുഴിച്ചിട്ടതെന്നാണ് പൊലിസ് നിഗമനം. അനീഷിന്റെ അച്ഛന്‍ വാസു മാത്യുവിന്റെ മകളോടു ഫോണിലാണ് കൊലപാതകവിവരം വെളിപ്പെടുത്തിയത്. തുടര്‍ന്ന് മാത്യുവിന്റെ മകള്‍ നൈസിയുടെ പരാതിയുടെ അടിസ്ഥാനത്തില്‍ നടത്തിയ ചോദ്യം ചെയ്യലിലാണ് അനീഷ് കുറ്റം സമ്മതിച്ചത്.