ഡെറാഡൂണ്‍: വെള്ളിയാഴ്ച ജുമുഅയുടെ ഭാഗമായി ഇസ്‌ലാം മത വിശ്വാസികളായ ഉദ്യോഗസ്ഥര്‍ക്ക് 90 മിനിറ്റ് അവധി നല്‍കിയ ഉത്തരാഖണ്ഡ് സര്‍ക്കാരിനെ ചോദ്യം ചെയ്ത് ബി.ജെ.പി രംഗത്ത്.

ബി.ജെ.പി നേതാവ് അനില്‍ ബലൂനിയാണ് ഉത്തരാഖണ്ഡ് മുഖ്യമന്ത്രി ഹരീഷ് റാവത്തിനെതിരേ രംഗത്തെത്തിയത്. വരാന്‍ പോകുന്ന നിയമസഭ തെരഞ്ഞെടുപ്പ് നഷ്ടപ്പെടുമെന്ന് ഭയന്നാണ് ഹരീഷ് റാവത്ത് ഇത്തരം തീരുമാനമെടുത്തതെന്നാണ് അനില്‍ പ്രസ്താവിച്ചത്. തെരഞ്ഞെടുപ്പില്‍ സ്വാധീനം ചെലുത്താനുള്ള കോണ്‍ഗ്രസിന്റെ സ്ഥിരം ഇടപെടലുകളാണിതെന്നും അദ്ദേഹം കുറ്റപ്പെടുത്തി. മുഖ്യമന്ത്രി ഹരീഷ് റാവത്തിന്റെ നേതൃത്വത്തില്‍ കഴിഞ്ഞ മന്ത്രിസഭ യോഗത്തിലാണ് ജുമുഅയുടെ ഭാഗമായി വെള്ളിയാഴ്ചകളില്‍ 12.30 മുതല്‍ 2 മണി വരെ മുസ്‌ലിം ജീവനക്കാര്‍ക്ക് അവധി നല്‍കാന്‍ തീരുമാനിച്ചത്.

അതേ സമയം ഉത്തരാഖണ്ഡ് കോണ്‍ഗ്രസ് പ്രസിഡന്റ് കിഷോര്‍ ഉപാധ്യായ സര്‍ക്കാരിന്റെ നടപടിയെ സ്വാഗതം ചെയ്ത് രംഗത്തു വന്നു. ഇതിനെ എതിര്‍ക്കുന്നവര്‍ ആത്മപരിശോധന നടത്തണമെന്നും അദ്ദേഹം പറഞ്ഞു.