മനാമ: ബഹ്‌റൈനിലെ  മലയാളി സാമൂഹ്യ പ്രവര്‍ത്തകനായ ചന്ദ്രന്‍ തിക്കോടിക്ക് ബഹ്‌റൈനിലെ പ്രവാസി ഗൈഡന്‍സ് ഫോറത്തിന്റെ കര്‍മജ്യോതി അവാര്‍ഡ് സമ്മാനിച്ചു.


ബഹ്‌റൈനിലെ സല്‍മാനിയ്യ മെഡിക്കല്‍ കോളേജ് കേന്ദ്രീകരിച്ചു നടത്തുന്ന സേവന പ്രവര്‍ത്തനങ്ങള്‍ പരിഗണിച്ചാണ് കോഴിക്കോട് ജില്ലയിലെ തിക്കോടി സ്വദേശിയായ ചന്ദ്രനെ അവാര്‍ഡിന് തിരഞ്ഞെടുത്തത്.


ഇവിടെ മനാമ  കെ.സി.എ ഹാളില്‍ നടന്ന പ്രൗഢഗംഭീരമായ ചടങ്ങില്‍ വെച്ച് പ്രവാസി ഗൈഡന്‍സ് ഫോറം പ്രസിഡണ്ടും ഫോര്‍ പി.എം ന്യൂസ് മാനേജിംഗ് എഡിറ്ററുമായ പ്രദീപ് പുറവങ്കരയാണ് അവാര്‍ഡ് സമ്മാനിച്ചത്.


പ്രവാസി ഗൈഡന്‍സ് ഫോറം സി.ഇ.ഒ ജോണ്‍ പനയ്ക്കല്‍ പൊന്നാട അണിയിച്ചു. ജനറല്‍ സെക്രട്ടറി രവി മാരാത്ത് സ്വാഗതം പറഞ്ഞു.