തിരുവനന്തപുരം: കേരള സൈക്ലിങ് അസോസിയേഷന്‍ സംഘടിപ്പിക്കുന്ന ദേശീയ ട്രാക്ക് സൈക്ലിങ് ചാംപ്യന്‍ഷിപ്പ് നാളെ മുതല്‍ 25 വരെ തിരുവനന്തപുരം കാര്യവട്ടം എല്‍.എന്‍.സി.പി.ഇ വെലോഡ്രോമില്‍ നടക്കും. സര്‍വിസസ്, റെയില്‍വേ, ബി.എസ്.എന്‍.എല്‍ ടീമുകളിലെ അറുനൂറോളം കായികതാരങ്ങള്‍ സബ് ജൂനിയര്‍, ജൂനിയര്‍, സീനിയര്‍ വിഭാഗങ്ങളിലായി പങ്കെടുക്കും.
2017 ഫെബ്രുവരിയില്‍ ഡല്‍ഹിയില്‍ നടക്കുന്ന ഏഷ്യന്‍ സൈക്ലിങ് ചാംപ്യന്‍ഷിപ്പിന് മുന്നോടിയായി നടക്കുന്ന മത്സരത്തില്‍ ആന്‍ഡമാന്‍ നിക്കോബാറില്‍ നിന്നുള്ള കുമാരി ഡബോറ, കേരള താരം കെസിയ വര്‍ഗീസ്, ഏഷ്യന്‍ ഗെയിംസ് താരങ്ങളായ ലിഡിയ മോള്‍, വി രജനി തുടങ്ങിവര്‍ പങ്കെടുക്കും. നാളെ രാവിലെ 11നു കായിക മന്ത്രി എ.സി.മൊയ്തീന്‍ ഉദ്ഘാടനം ചെയ്യും. മന്ത്രി കടകംപള്ളി സുരേന്ദ്രന്‍ അധ്യക്ഷത വഹിക്കും.