തുറവൂര്‍: ട്രെയിന്‍ കടന്നു പോകുന്നതിന് അടച്ച റെയില്‍വേ ഗെയിറ്റ് മണിക്കൂറോളം തുറക്കാനാവാത്തത് വാഹന യാത്രികരെ ദുരിതത്തിലാക്കി. തീരദേശ പാതയിലെ തുറവൂര്‍ റെയില്‍ ഗെയിറ്റാണ് സാങ്കേതിക തകരാര്‍ മൂലം തുറക്കാനാവാതെ വന്നത്.ഇന്നലെ ഉച്ചയോടെ പാസഞ്ചര്‍ ട്രെയിന്‍ കടന്നു പോകുന്നതിന് അടച്ച റെയില്‍വേ ഗെയിറ്റാണ് തുറക്കാനായില്ല.തുറവൂര്‍ റ്റി.ഡി.റോഡില്‍ വാഹന ഗതാഗതം തടസ്സപ്പെട്ടു. ഇതു വഴി ചേര്‍ത്തല എറണാകുളം കുമ്പളങ്ങി, അരൂര്‍മുക്കം ഭാഗങ്ങളിലേക്ക് സര്‍വീസ് നടത്തുന്ന സ്വകാര്യ ബസുകളും മറ്റു വാഹനങ്ങളും പാട്ടുകുളങ്ങര റോഡ് വഴിയാണ് സര്‍വീസ് നടത്തിയത്.എഴുപുന്ന റെയില്‍വേ ഗെയിറ്റ് അടിക്കടി തകരാറിലാകുന്നത് നിത്യസംഭവമാണ്. ഗെയിറ്റ് തകരാറിലായാല്‍ എറണാകുളത്ത് നിന്നോ തിരുവനന്തപുരത്ത് നിന്നോ വിദഗ്ധര്‍ എത്തിയാണ് നന്നാക്കേണ്ടത്. തുറവൂര്‍ റെയില്‍വേ ക്രോസില്‍ അത്യാധുനിക സംവിധാനത്തോടുള്ള ഗെയിറ്റ് സ്ഥാപിച്ചിട്ടും അടിക്കടി തകരാര്‍ സംഭവിക്കുന്നത് നിത്യസംഭവമാണ്.