മലപ്പുറം: പള്ളിയില്‍ വിശ്വാസികളെ അക്രമിക്കുകയും അരാജകത്വം സൃഷ്ടിക്കുകയും ചെയ്ത കാന്തപുരം വിഭാഗത്തിന്റെ നടപടിക്കെതിരേ എസ്.വൈ.എസ് വിശദീകരണ സമ്മേളനം ഇന്നു പള്ളിക്കല്‍ ബസാറിനു സമീപം അങ്ങാടിപ്പറമ്പില്‍ നടക്കും.
പഞ്ചായത്ത് എസ്.വൈ.എസ് കമ്മിറ്റി സംഘടിപ്പിക്കുന്ന സമ്മേളനം മഗ്‌രിബ് നിസ്‌കാരാനന്തരം എസ്.വൈ.എസ് സംസ്ഥാന ജനറല്‍ സെക്രട്ടറി സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. ജില്ലാ ജനറല്‍ സെക്രട്ടറി അബ്ദുസ്സമദ് പൂക്കോട്ടൂര്‍ മുഖ്യപ്രഭാഷണം നടത്തും.
ഹാജി കെ. മമ്മദ് ഫൈസി, പി.എ ജബ്ബാര്‍ ഹാജി, കെ.പി മുസ്തഫ തങ്ങള്‍ തുടങ്ങിയവര്‍ സംബന്ധിക്കും. സമ്മേളനത്തിനു മുന്നോടിയായി പ്രകടനവും നടക്കും. പങ്കെടുക്കുന്ന പ്രവര്‍ത്തകര്‍ മഗ്‌രിബ് നിസ്‌കാരത്തിനു പള്ളിക്കല്‍ബസാര്‍ പള്ളിയിലെത്തണം.