തിരുവനന്തപുരം: ശമ്പളം കിട്ടാതെ കുടുംബം പട്ടിണിയിലായ കെ.എസ്.ആര്‍.ടി.സി ജീവനക്കാര്‍ കൂട്ടത്തോടെ ആശുപത്രികളിലെത്തി രക്തം വിറ്റു. സെക്രട്ടേറിയറ്റിനു മുന്നില്‍ രാപകല്‍ സമരത്തിലേര്‍പ്പെട്ടിരിക്കുന്ന മുപ്പതോളം ജീവനക്കാരാണ് 1000 രൂപയ്ക്കു വേണ്ടി ആവശ്യക്കാര്‍ക്ക് രക്തം നല്‍കിയത്. ഇന്നലെ വൈകിട്ട് യൂനിയന്‍ ജില്ലാ സെക്രട്ടറി പ്രദീപ് ശ്രീധറിന്റെ നേതൃത്വത്തില്‍ മുറിഞ്ഞപാലത്തെ കോസ്‌മോ പോളിറ്റന്‍ ആശുപത്രിയിലെത്തിയാണ് സമരക്കാര്‍ രക്തം നല്‍കിയത്. വരും ദിവസങ്ങളിലെല്ലാം രക്തം ആവശ്യമുള്ളവര്‍ സമരപ്പന്തലുമായി ബന്ധപ്പെട്ടാല്‍ മതിയെന്നാണ് നേതാക്കള്‍ പറയുന്നത്. രക്തം നല്‍കുമ്പോള്‍ ആവശ്യക്കാര്‍ പണം പകരം നല്‍കണമെന്നും ഇവര്‍ പറയുന്നു. മറ്റു മാര്‍ഗങ്ങളെല്ലാം അടഞ്ഞതോടെയാണ് സമരക്കാര്‍ ഈ വഴി തിരഞ്ഞെടുത്തിരിക്കുന്നത്.