കൊച്ചി : കലൂരില്‍ മെട്രോ നിര്‍മാണത്തിനായി സെന്റ് ആല്‍ബര്‍ട്ട്‌സ് കോളജിന്റെ ഭൂമി ഏറ്റെടുത്തതിനു പകരം കോളജിനു നല്‍കിയ ഭൂമിയില്‍ നിര്‍മാണ പ്രവര്‍ത്തനങ്ങള്‍ പാടില്ലെന്ന് ഹൈക്കോടതി ഉത്തരവിട്ടു.
സെന്റ് ആല്‍ബര്‍ട്ട്‌സ് കോളജിന് പകരം ഭൂമി നല്‍കിയതും കോളജ് അധികൃതര്‍ നല്‍കാനുള്ള പാട്ടത്തുക എഴുതിത്തള്ളിയതിനുമെതിരേ കടവന്ത്ര സ്വദേശി ചെഷയര്‍ ടാര്‍സന്‍ നല്‍കിയ ഹരജിയിലാണ് ഹൈക്കോടതിയുടെ ഇടക്കാല ഉത്തരവ്. 1983 ലാണ് സെന്റ് ആല്‍ബര്‍ട്ട്‌സ് കോളജിന് കലൂര്‍ സ്റ്റേഡിയത്തിനു സമീപം ഭൂമി സര്‍ക്കാര്‍ പാട്ടത്തിന് നല്‍കിയത്. പിന്നീട് 1995 ല്‍ പാട്ടക്കാലാവധി 50 വര്‍ഷമായി ഉയര്‍ത്തി.
1995 മുതല്‍ 2014 വരെ സെന്റ് ആല്‍ബര്‍ട്ട്‌സ് കോളജ് അധികൃതര്‍ പാട്ടത്തുക സര്‍ക്കാരിന് നല്‍കിയില്ലെന്നും ഈ ഇനത്തില്‍ 1.81 ലക്ഷം രൂപ നല്‍കാനുണ്ടെന്നും ഹരജിയില്‍ പറയുന്നു.
ഇതിനിടെയാണ് കൊച്ചി മെട്രോ സ്റ്റേഷനും പാര്‍ക്കിങിനുമായി 88 സെന്റ് ഭൂമി ഏറ്റെടുത്തത്. ഇതിനു പകരം കലൂര്‍ സ്റ്റേഡിയത്തിനു സമീപം തന്നെ രണ്ടിടത്തായി 88 സെന്റ് ഭൂമി നല്‍കി. ഒരിടത്ത് 74 സെന്റ് സ്ഥലവും മറ്റൊരിടത്ത് 14 സെന്റ് സ്ഥലവുമാണ് അനുവദിച്ചത്.
പാട്ടക്കരാര്‍ അനുസരിച്ച് കോളജ് അധികൃതര്‍ 2016 ഫെബ്രുവരി വരെയുള്ള കണക്ക് പ്രകാരം രണ്ടു കോടിയോളം രൂപ കുടിശ്ശികയുണ്ടെന്നും ഇതു സര്‍ക്കാര്‍ എഴുതിത്തള്ളിയെന്നും ഹരജിയില്‍ പറയുന്നു.